आळंदी : इंद्रायणी नदीच्या पावित्र्य आणि आध्यात्मिक परंपरेला अधिक बळ देण्यासाठी आळंदी देवस्थानच्या वतीने आयोजित करण्यात येणार्या महाआरती उपक्रमास आळंदी नगरपरिषदेचे पूर्ण सहकार्य राहील, अशी ग्वाही नगराध्यक्ष प्रशांत कुर्हाडे यांनी दिली. या उपक्रमात नगरपरिषदेसह ग्रामस्थांचा सक्रिय राहणार असल्याचेही त्यांनी स्पष्ट केले. आळंदी देवस्थानच्या वतीने नुकताच नवनिर्वाचित नगराध्यक्ष व नगरसेवकांचा सन्मान सोहळा आयोजित करण्यात आला होता. त्यावेळी नगराध्यक्ष कुर्हाडे बोलत होते. यावेळी देवस्थानचे प्रमुख विश्वस्त योगी निरंजनाथ, विश्वस्त चैतन्य महाराज कबीर, डॉ. भावार्थ देखणे, अॅड. राजेंद्र उमाप, अॅड. रोहिणी पवार, पुरुषोत्तम महाराज पाटील, माजी नगराध्यक्ष बबनराव कुर्हाडे, मुख्याधिकारी माधव खांडेकर, व्यवस्थापक ज्ञानेश्वर वीर, नवनिर्वाचित नगरसेवक तसेच ग्रामस्थ मोठ्या संख्येने उपस्थित होते. नगराध्यक्ष प्रशांत कुर्हाडे म्हणाले, इंद्रायणी नदी ही केवळ जलस्रोत नसून आळंदीची श्रद्धा व ओळख आहे. महाआरतीसारख्या उपक्रमातून नदी संवर्धनाबरोबरच धार्मिक व सांस्कृतिक मूल्यांचे जतन होईल. देवस्थानच्या प्रत्येक सकारात्मक उपक्रमात नगरपरिषद भक्कमपणे उभी राहील. देवस्थानच्या पदाधिकार्यांनी नगरपरिषदेच्या सहकार्याबद्दल समाधान व्यक्त करत, महाआरती उपक्रमामुळे भाविकांमध्ये पर्यावरण संवर्धनाबाबत जनजागृती होईल, असा विश्वास व्यक्त केला.
