Supriya Sule : बीड जिल्ह्यातील स्थानिक स्वराज्य संस्थांच्या निवडणुकांसाठी मुंडे बंधू-भगिनी मैदानात उतरल्याचे पाहायला मिळत आहे. नुकत्याच झालेल्या एका जाहीर सभेत बोलताना माजी मंत्री धनंजय मुंडे यांनी वाल्मिक कराडची उणीव भासत असल्याचे विधान केले होते. त्यांनी केलेल्या विधानामुळे महाराष्ट्राच्या राजकीय वर्तुळात चर्चांना उधाण आले आहे. माझा सहकारी आज आपल्यात नाही याची जाणीव आहे. तसेच न्यायालय काय खरे काय खोटे हे तपासून पाहील, असे विधान धनंजय मुंडे यांनी केले होते. त्यांनी केलेल्या विधानावर राष्ट्रवादी काँग्रेस पक्ष शरद पवार गटाच्या खासदार सुप्रिया सुळे यांनी तीव्र शब्दांत निषेध नोंदविला आहे. अशा लोकांबद्दल राज्यातील कोणत्याही नेत्याला आठवण येत असेल तर त्याचा जाहीर निषेधच केला पाहजे. अशा प्रवृत्तीला कोणत्याही पक्षातून मदत करण्याची भूमिका होत असेल तर त्या पक्षातून त्यांना काढून टाकले पाहिजे, असे म्हणत सुप्रिया सुळे यांनी धनंजय मुंडेंची पक्षातून हकालपट्टी करण्याची मागणी केली आहे. बीडमधील संरपंच संतोष देशमुख हत्या प्रकरणात वाल्मिक कराड याला अटक करण्यात आली. सध्या कराड जेलमध्ये आहे. देशमुख हत्या प्रकरणाने महाराष्ट्रात खळबळ उडवून दिली होती. वाल्मिक कराड हा धनंजय मुंडे यांचा निकटवर्तीय असल्याने त्यांना राजीनामा द्यावा लागला होता. त्यामुळे पुन्हा एकदा कराडची जाहीर सभेतून उणीव भासत असल्याचे विधान करून धनंजय मुंडे नव्या वादात सापडण्याची शक्यता आहे. नेमकं काय म्हणाले होते धनंजय मुंडे? “मला माझ्या सहकाऱ्याची आज आठवण येतेय. परळीतले जगमित्र कार्यालय १२ महिने २४ तास सुरू होते आणि आहे. पण तिथे एक व्यक्ती नाहीये. त्या कार्यालयातून अडल्या नडलेल्यांना गोरगरिबांना आपण मदत करायचो. पण या सगळ्यात एक सहकारी आपल्यात नाहीये, याची मला जाणीव आहे. कुणाचे काय चुकले, काय नाही हे न्यायदेवता तपासून पाहील,” असे विधान माजी मंत्री धनंजय मुंडे यांनी परळी येथे आयोजित जाहीर सभेतून केले होते. महाराष्ट्राचे पहिले मुख्यमंत्री राहिलेले यशवंतराव चव्हाण यांच्या पुण्यतिथीनिमीत्त त्यांच्या कराड येथे समाधीस्थळी खासदार सुप्रिया सुळे यांनी आज अभिवादन केले. त्यानंतर त्यांनी माध्यमांशी संवाद साधला. यावेळी त्यांनी धनंजय मुंडे यांनी केलेल्या विधानाचा निषेध नोंदवत त्यांची पक्षातून हकालपट्टी करण्याची मागणी केली. सुप्रिया सुळे काय म्हणाले? “मुंडे यांच्या वक्तव्याचा मी जाहीर निषेध करते. कोणाच्या तरी वडिलांची, महाराष्ट्राच्या लेकाची क्रुर हत्या ज्यांनी केली, अशा लोकांना फाशीची शिक्षा द्यायला पाहिजे. अशा लोकांबद्दल राज्यातील कोणत्याही नेत्याला आठवण येत असेल तर त्याचा जाहीर निषेधच केला पाहजे. अशा प्रवृत्तीला कोणत्याही पक्षातून मदत करण्याची भूमिका होत असेल तर त्या पक्षातून त्यांना काढून टाकले पाहिजे, अशी माझी पक्षाच्या नेत्यांना विनंती आहे. असे वक्तव्य होत असेल तर ते महाराष्ट्राच्या ऐक्यासाठी घातक आहे. क्रुर हत्येमागच्या लोकांची यांना आठवण असेल तर यांची विचारधारा काय आहे याच्यावरच प्रश्नचिन्ह आहे, अशा तीव्र शब्दांत सुप्रिया सुळे यांनी धनंजय मुंडे यांच्या विधानाचा निषेध नोंदवला. हेही वाचा : Rekha: रेखा आणि मौसमी चटर्जी यांच्यात झालेला वाद; पोस्टरवर फोटो पुढे आल्यामुळे पेटला होता वाद
