Mumbai Municipal Corporation Election Result : मुंबई महापालिकेच्या निकालांना सुरुवात झाली असून या निकालांनी मुंबईतील सर्वपक्षीय प्रस्थापित नेत्यांना जोरदार धक्का दिला आहे. महापालिका निवडणुकांदरम्यान घराणेशाहीचा मुद्दा ऐरणीवर असतानाच मतदारांनी थेट निर्णय घेत अनेक बड्या नेत्यांच्या कुटुंबीयांना नाकारले असल्याचे चित्र दिसून येत आहे. विशेष म्हणजे राज्याचे उपमुख्यमंत्री एकनाथ शिंदे यांच्याशी संबंधित तीन बड्या नेत्यांच्या कुटुंबीयांना पराभवाला सामोरे जावे लागले आहे. खासदार रविंद्र वायकर यांची कन्या, माजी खासदार राहुल शेवाळे यांची वहिनी तसेच माजी आमदार सदा सरवणकर यांचा मुलगा यांचा पराभव झाला आहे. याशिवाय राष्ट्रवादी काँग्रेसचे नेते नवाब मलिक यांचे बंधू कॅप्टन मलिक यांनाही मतदारांनी नाकारले आहे. बृहन्मुंबई महानगरपालिका सार्वत्रिक निवडणूक 2025-26 अंतर्गत 15 जानेवारी 2026 रोजी मतदान झाले होते. त्याची मतमोजणी आज शुक्रवार, 16 जानेवारी 2026 रोजी सकाळी 10 वाजल्यापासून मुंबईतील 23 मतमोजणी केंद्रांवर सुरू आहे. सुरुवातीच्या कलानुसार भाजप-शिंदेसेना आघाडीला ठाकरे बंधूंच्या शिवसेनेकडून जोरदार टक्कर मिळत असल्याचे दिसून येत आहे. मतदानोत्तर चाचण्यांमध्ये महायुतीला स्पष्ट बहुमत मिळेल आणि 150 जागांचा टप्पा पार होईल, असे भाकीत वर्तवण्यात आले होते. मात्र प्रत्यक्ष निकालांमध्ये ही गणिते बिघडत असल्याचे चित्र आहे. घराणेशाहीचा फटका कुणाला बसला? खासदार रविंद्र वायकर यांची कन्या दिप्ती वायकर यांचा वॉर्ड क्रमांक 73 मधून पराभव झाला आहे. धारावीतील वॉर्ड क्रमांक 183 मध्ये काँग्रेसच्या आशा काळे यांनी शिंदे गटाच्या वैशाली शेवाळे यांचा 1450 मतांनी पराभव केला. वैशाली शेवाळे या माजी खासदार राहुल शेवाळे यांच्या वहिनी आहेत. तसेच प्रभादेवी येथील वॉर्ड क्रमांक 194 मध्येही मोठा उलटफेर झाला असून समाधान सरवणकर यांना पराभवाचा धक्का बसला आहे. समाधान सरवणकर हे माजी आमदार सदा सरवणकर यांचे पुत्र आहेत. नवाब मलिक यांचे बंधू कॅप्टन मलिक पराभूत राष्ट्रवादी काँग्रेसचे नेते नवाब मलिक यांचे बंधू कॅप्टन मलिक यांचा वॉर्ड क्रमांक 164 मध्ये पराभव झाला आहे. या जागेसाठी मलिक कुटुंबीयांनी मोठी ताकद लावली होती. मात्र काँग्रेसच्या उमेदवाराने या प्रभागात विजय मिळवला. ‘डॅडी’ अरुण गवळींची लेकही पराभूत भायखळा आणि दगडी चाळ परिसरातील प्रभावशाली मानल्या जाणाऱ्या गवळी कुटुंबालाही यंदा मतदारांनी धक्का दिला आहे. ‘डॅडी’ अरुण गवळी यांची कन्या गीता गवळी या निवडणुकीत पराभूत झाल्या आहेत. याआधी नगरसेवक राहिलेल्या गीता गवळी यांना यावेळी मतदारांचा कौल मिळू शकला नाही.
