Mardaani 3 : बॉलीवूडची दमदार अभिनेत्री राणी मुखर्जी पुन्हा एकदा ‘शिवानी शिवाजी रॉय’ या धडाकेबाज पोलीस अधिकाऱ्याच्या भूमिकेत मोठ्या पडद्यावर परतत आहे. ‘मर्दानी’ आणि ‘मर्दानी २’ च्या तुफान यशानंतर आता या फ्रँचायझीचा तिसरा भाग प्रेक्षकांच्या भेटीला येणार आहे. नुकतंच या सिनेमाचा अधिकृत ट्रेलर प्रदर्शित झाला असून, ३ मिनिट १६ सेकंदांचा हा ट्रेलर प्रेक्षकांना सुरुवातीपासून शेवटपर्यंत खिळवून ठेवतो. चित्रपटाची कथा सत्य घटनांवर आधारित असल्याचे ट्रेलरमध्ये सांगण्यात आले आहे. अवघ्या ३ महिन्यांत ९३ मुली गायब झाल्याचे धक्कादायक वास्तव समोर येते. या प्रकरणाचा तपास एनआयए (NIA) अधिकारी शिवानी रॉय यांच्याकडे सोपवला जातो. बेपत्ता मुलींच्या या रॅकेटचा छडा लावताना शिवानीचा सामना ‘कुसूमपूरच्या अम्मा’शी होतो. ‘अम्मा’ ही एक निर्दयी आणि क्रूर स्त्री असून ती गरीब घरातील मुलींचे अपहरण करते. तगडी स्टारकास्ट आणि पडद्यामागचे कलाकार : ‘अम्मा’च्या भूमिकेत अभिनेत्री मल्लिका प्रसाद झळकणार असून, तिचा जबरदस्त वावर ट्रेलरमध्ये पाहायला मिळतो. ‘शैतान’ फेम जानकी बोडीवाला ही देखील एका महत्त्वपूर्ण भूमिकेत दिसणार आहे. ‘द रेल्वे मॅन’ फेम आयुष गुप्ता यांनी या चित्रपटाचे लेखन केले आहे, तर दिग्दर्शनाची धुरा अभिराज मिनावाला यांनी सांभाळली आहे. आदित्य चोप्रा यांनी या चित्रपटाची निर्मिती केली आहे. सामाजिक वास्तवावर प्रहार : ‘मर्दानी’च्या पहिल्या भागात मानवी तस्करी आणि दुसऱ्या भागात विकृत मानसिकतेच्या गुन्हेगारावर प्रकाश टाकण्यात आला होता. आता तिसऱ्या भागात समाजातील आणखी एक गडद आणि क्रूर वास्तव मांडले जाणार आहे. शिवानी रॉय आणि अम्मा यांच्यातील फोनवरील संवाद आणि बुद्धीची लढाई हा या चित्रपटाचा मुख्य आकर्षणबिंदू ठरणार आहे. हा थरार येत्या ३० जानेवारी रोजी सर्वत्र चित्रपटगृहात प्रदर्शित होणार आहे.
