मुंबई : गेल्या काही काळापासून अभिनेत्री मलायका अरोरा आणि अभिनेता अर्जुन कपूर यांच्या नात्यात दुरावा आल्याच्या बातम्या येत आहेत. याच दरम्यान, मलायका एका नवीन व्यक्तीला डेट करत असल्याच्या चर्चांना उधाण आलं होतं. डायमंड व्यावसायिक हर्ष मेहतासोबत मलायकाचं नाव जोडलं जात होतं, मात्र आता खुद्द मलायकाने यावर आपली भूमिका स्पष्ट केली आहे. नेमकं प्रकरण काय? गेल्या वर्षी ऑक्टोबर महिन्यात मुंबईत झालेल्या एनरिक इग्लेसियसच्या कॉन्सर्टमध्ये मलायका अरोरा आणि ३३ वर्षीय उद्योगपती हर्ष मेहता एकत्र दिसले होते. त्यानंतर अनेक सार्वजनिक कार्यक्रमांत त्यांच्या एकत्रित उपस्थितीमुळे नेटकऱ्यांनी तर्क-वितर्क लावायला सुरुवात केली. अर्जुन कपूरसोबत ब्रेकअप झाल्यानंतर मलायका आता हर्षच्या प्रेमात पडल्याचे दावे अनेक रिपोर्ट्समध्ये करण्यात आले होते. नम्रता झकारियाच्या शोमध्ये बोलताना मलायकाने या अफवा फेटाळून लावल्या आहे. हर्ष मेहतासोबतच्या नात्यावर मलायका स्पष्टच बोलली, “लोकांना बोलायला आवडतं. तुम्ही कोणासोबतही घराबाहेर पडलात की लगेच तुमचं नाव त्याच्याशी जोडलं जातं. तो व्यक्ती एखादा जुना मित्र असो किंवा विवाहित मित्र, चर्चा सुरूच होतात. खरं सांगू तर, मी आणि माझे मित्र या अफवांवर एकत्र बसून फक्त हसतो आणि विनोद करतो. मी या चर्चांना अधिक महत्त्व देऊ इच्छित नाही.” असं अभिनेत्री म्हणाली. अर्जुन कपूरबद्दल व्यक्त केल्या खास भावना : ब्रेकअपच्या चर्चा सुरू असल्या तरी अर्जुन कपूरबद्दल मलायकाच्या मनात आजही आदर आहे. “अर्जुन माझ्यासाठी खूप महत्त्वाचा आहे. काहीही झाले तरी तो माझ्या आयुष्यातील एक अविभाज्य भाग राहिला आहे.” आपल्या भूतकाळाबद्दल किंवा भविष्याबद्दल सार्वजनिकरीत्या जास्त भाष्य करायला तिला आवडत नसल्याचेही तिने यावेळी नमूद केले. मलायका म्हणाली की, तिचे वैयक्तिक जीवन सतत सार्वजनिक चर्चेचा विषय बनत असल्याने तिला त्रास होतो. “माझं आयुष्य फक्त माझ्यापुरतं मर्यादित असावं आणि लोकांनी माझ्या खाजगी आयुष्याचा आदर करावा, यासाठी मी प्रयत्नशील आहे,” असे सांगत तिने चाहत्यांना आणि माध्यमांना शांत राहण्याचे आवाहन केले आहे. १९ वर्षांच्या लग्नानंतर २०१७ मध्ये घटस्फोट : अभिनेत्री मलायका अरोरा आणि अभिनेता अरबाज खान यांनी १९९८ मध्ये लग्न केले आणि १९ वर्षांच्या लग्नानंतर २०१७ मध्ये एकमेकांना घटस्फोट दिला. दोघांना एक मुलगा ‘अरहान खान’ आहे, जो आपल्या आई-वडिलांसोबत राहतो. त्यांच्या घटस्फोटाला अनेक वर्षे झाली आहेत आणि खान कुटुंब आणि मलायका अरोरा एकत्र दिसले असे फार कमी प्रसंग आहेत.
