LSG Bowlers SA20 training for IPL 2026 : आयपीएल २०२६ च्या हंगामाला अद्याप काही महिन्यांचा कालावधी शिल्लक असला, तरी सर्वच संघांनी आपले नियोजन सुरू केले आहे. यामध्ये लखनऊ सुपर जायंट्स (LSG) संघाने एक पाऊल पुढे टाकत आपल्या गोलंदाजांच्या तयारीसाठी एक अनोखी आणि खास रणनीती आखली आहे. आपल्या गोलंदाजांना सराव आणि मॅचसाठी फिट ठेवण्यासाठी लखनऊने त्यांना दक्षिण आफ्रिकेला पाठवण्याचा निर्णय घेतला आहे. एसए२० लीगचा घेणार आधार – दक्षिण आफ्रिकेत लवकरच ‘एसए२०’ (SA20) या प्रसिद्ध टी-२० लीगची सुरुवात होणार आहे. लखनऊ सुपर जायंट्सची ‘सिस्टर फ्रँचायझी’ असलेला ‘डरबन सुपर जायंट्स’ हा संघ या स्पर्धेत खेळतो. लखनऊच्या व्यवस्थापनाने ठरवले आहे की, जे खेळाडू सध्या भारतीय संघात नाहीत किंवा कोणत्याही देशांतर्गत क्रिकेटमध्ये खेळत नाहीत, त्यांना या लीगमध्ये पाठवून सराव करुन घेतला जाईल. यामुळे खेळाडूंना जागतिक दर्जाच्या कोचिंग स्टाफसोबत काम करण्याची आणि स्वतःची कौशल्ये सुधारण्याची संधी मिळेल. आवेश आणि मोहसिन खान आघाडीवर – मिळालेल्या माहितीनुसार, वेगवान गोलंदाज आवेश खान आणि मोहसिन खान यांना दक्षिण आफ्रिकेला पाठवले जाण्याची दाट शक्यता आहे. यासोबतच तरुण वेगवान गोलंदाज नमन तिवारीचे नावही चर्चेत आहे. हे खेळाडू बीसीसीआयच्या सेंट्रल कॉन्ट्रॅक्टमध्ये समाविष्ट नसल्यामुळे, तांत्रिकदृष्ट्या त्यांच्या दक्षिण आफ्रिकेतील सरावावर कोणतीही अडचण येणार नाही. नुकतेच दुखापतीतून सावरलेल्या आवेश आणि मोहसिनसाठी हा दौरा आपली लय परत मिळवण्यासाठी अत्यंत महत्त्वाचा ठरणार आहे. हेही वाचा – Rohit Sharma : ‘ऑस्ट्रेलियात खेळणं किती कठीण, इंग्लंडलाच विचारा!’, रोहितने स्टोक्सच्या संघाची उडवली खिल्ली, पाहा VIDEO बीसीसीआयची परवानगी आणि दिग्गजांचे मार्गदर्शक – ‘क्रिकबज’च्या अहवालानुसार, लखनऊ सुपर जायंट्सने या उपक्रमासाठी बीसीसीआयची (BCCI) रीतसर परवानगी घेतली आहे. २६ डिसेंबरपासून सुरू होणाऱ्या या लीगमध्ये खेळाडूंना लांस क्लुजनर, टॉम मूडी आणि भरत अरुण यांसारख्या दिग्गज प्रशिक्षकांचे मार्गदर्शन मिळणार आहे. आयपीएल २०२६ चा हंगाम साधारणपणे २६ मार्चपासून सुरू होण्याची शक्यता आहे. त्यापूर्वी दक्षिण आफ्रिकेतील हा उच्च-दर्जाचा सराव लखनऊच्या गोलंदाजांना अधिक धारदार बनवण्यास मदत करेल, अशी अपेक्षा व्यक्त केली जात आहे.
