जांबुत : शिरूर तालुक्याचा बेट भागात मोठ्या प्रमाणात अवैध धंद्याचा सुळसुळाट झाला आहे. अवैध दारू विक्री, ताडी विक्रीसह काही ठिकाणी चालू असलेल्या मटका, जुगार यावर पोलीस प्रशासनाचा अंकुश राहिला नसल्याचे दिसून येत आहे. अनेक दारू विक्री अड्डयावर सकाळच्या प्रहरी दारूचे सेवन करण्यासाठी मोठी रांग लागताना दिसत असुन याचा परिसरातील महिलांसह नागरिकांना नाहक त्रास सहन करावा लागत असल्याचे काही महिलांनी खाजगीत बोलूनही दाखवले. मात्र सद्यस्थित शिरूर पोलीस स्टेशन अंकीत असलेल्या टाकळी हाजी दूरक्षेत्राच्या कार्यक्षेत्रात अशा प्रकारच्या धंद्याचे स्तोम माजलेले असुन सर्वाधिक अवैध धंदे कार्यान्वित असलेल्या या भागात पोलीस प्रशासनाकडून कारवाई का करण्यात येत नाही असा प्रश्न नागरिक उपस्थित करत आहेत. मागील एक वर्षापूर्वी पुणे ग्रामीणच्या तत्कालीन पोलीस अधीक्षकांनी ज्या पोलीस ठाण्याचा कार्यक्षेत्रात अशा प्रकारेचे अवैध धंदे चालू असतील त्या ठाणेप्रमुखांवर कारवाई करणार असल्याचे आदेश दिले असताना देखील त्या आदेशाला पोलीस प्रशासनाकडून केराची टोपली दाखविण्यात येत असल्याचे दिसून येत आहे. टाकळी हाजी दूरक्षेत्राच्या कार्यक्षेत्रात जर अवैध प्रकारे चालू असणाऱ्या धंद्याना नक्की कोणाचे पाठबळ आहे असा सवाल उपस्थित होत आहे. चुकीच्या पद्धतीने अलबेल पणे चालू असणाऱ्या धंद्यावाल्याना पोलिसांचा धाक राहिला नसून पोलीस प्रशासन देखील कारवाईसाठी टाळाटाळ करत आहे. जर याआधीच्या काळातच या कारवाया झाल्या असत्या तर आज या धंद्याचे अधिकचे प्रमाण वाढले नसते परिणामी अशा प्रकारे अवैधपणे चालू असणारी दारू विक्री, ताडी विक्री, जुगार आणि मटका अड्डे यात तरुण वर्ग व्यसनाच्या अधीन जात असुन कित्येक संसार उध्वस्त होत असल्याचे दिसून येते. मात्र हे सगळं ‘तेरी भी चूप, मेरी भी चूप’ असे ठरवून चालत असेल तर हे पोलीस प्रशासनाचे सपशेल अपयश असुन अशा चुकीच्या प्रकारे सुरु असलेल्या धंद्यावर पोलीस प्रशासन काय कारवाई करणार हे पाहणे महत्वाचे ठरणार आहे. ( याआधीच्या काळात तत्कालीन सहायक पोलीस निरीक्षक अमोल पन्हाळकर व पोलीस उपनिरीक्षक सुनिल उगले यांनी अनेक कारवाया करत या धंद्यावर अंकुश ठेवत धाक निर्माण करून या गोष्टींना आळा घालण्याचे काम केले होते. मात्र अलीकडे अशा प्रकारच्या कोणत्याही कारवाया होत नसून टाकळी हाजी दूरक्षेत्राच्या पोलीस अधिकारी व कर्मचारी यांचा धाक राहिला नसल्याचे दिसून येते.)
