Tejasvee Ghosalkar : मुंबई महापालिकेसाठी उद्धव ठाकरे स्वतः मैदानात उतरले असून, उमेदवारांच्या प्रचारार्थ विविध प्रभागांमध्ये ते भेटी देत आहेत. ठाकरेंचे अत्यंत विश्वासू दिवंगत माजी नगरसेवक अभिषेक घोसाळकर यांच्या निधानंतर त्यांच्या पत्नी तेजस्वी घोसाळकर उद्धव ठाकरे यांच्यासोबत राहिल्या. मात्र, मुंबई महापालिका निवडणूक जाहीर झाल्यानंतर त्यांनी भाजपात प्रवेश केला. त्या मुंबईतील वार्ड क्रमांक २ दहिसर येथून भाजपकडून उमेदवार म्हणून निवडणुकीच्या रिंगणात आहेत. याच प्रभागात उद्धव ठाकरे आल्यानंतर त्यांनी एक विधान केले होते. त्या विधानाला आता तेजस्वी घोसाळकर यांनी जोरदार प्रत्युत्तर दिले आहे. उद्धव ठाकरे काय म्हणाले होते? आज अभिषेक असता तर घोसाळकरांचं घर फोडण्याची भाजपची हिंमत झाली नसती, असे विधान उद्धव ठाकरे यांनी काही दिवसांपूर्वी केले होते. मी तेजस्वी घोसाळकर यांच्या विरोधात आलो नाही, तर भाजपची प्रवृत्ती ठेचायला आलोय, असेही उद्धव ठाकरे म्हणाले होते. वॉर्ड क्रमांक 2 मधील ठाकरे गटाच्या उमेदवार धनश्री कोलगे यांच्या प्रचार कार्यालयात उद्धव ठाकरेंनी भेट दिली होती. त्यावेळी त्यांनी वरील विधान केले होते. तेजस्वी घोसाळकर यांचे प्रत्युत्तर मी आणि अभिषेकने दोघांनी मिळून प्रत्येक निर्णय घेतले होते. अभिषेक असता तर जे काही असेल ते दोघांनी मिळूनच केलं असतं, अशा शब्दांत प्रत्युत्तर तेजस्वी घोसाळकर यांनी उद्धव ठाकरे यांनी केलेल्या विधानावर दिले आहे. पुढे त्या म्हणाल्या, मला असं वाटतं की, अजूनही अभिषेक माझ्याबरोबरच आहेत. उद्धव ठाकरे अभिषेकचं नाव घेऊन उगाचच प्रचार करत आहेत. निष्ठावंत वैगरे…ते चुकीचं आहे. उगाचचं तुम्ही अभिषेकचं नाव कशाला घेत आहात, असा सवाल त्यांनी उद्धव ठाकरे यांना केला आहे. माझा नवरा आहे, मी काहीही करु शकते, असे देखील तेजस्वी घोसाळकर म्हणाल्या आहेत. त्यांनी एका मराठी वृत्तवाहिनीला दिलेल्या मुलाखत दिली त्यावेळी त्या बोलत होत्या. हेही वाचा : मुंबईत मराठी टिकवण्यात ठाकरेंचा काय सहभाग? भाजपचा थेट सवाल, राजकारण तापणार..
