मॉस्को – युरोपातल्या देशांमध्ये असलेल्या रशियाची मालमत्ता गोठवण्याचा निर्णय युरोपीय संघाने घेतला आहे. मात्र या निणर्यावरून रशियाने जोरदार थयथयाट केला आहे. ही मालमत्ता गोठवणे म्हणजे युक्रेनबरोबरच्या शांतता प्रक्रियेला लक्ष्य करण्याची कृती असल्याचे रशियाने म्हटले आहे. यामुळे युक्रेन प्रश्नावर तोडगा शोधण्याऐवजी ही समस्या अधिकच चिघळू शकेल. जर युरोपीय संघाने रशियाची मालमत्ता गोठवली, तर रशिया काही तासातच या कृतीला प्रत्युत्तर देईल, असा इशाराही रशियाने दिला आहे. युरोपीय संघामध्ये गोठवलेल्या रशियाच्या सेंट्रल बँकेच्या मालमत्तेचे रशियामध्ये परत हस्तांतरण करण्यास तात्पुरत्या स्वरूपात बंदी घालण्याचा निर्णय शुक्रवारी युरोपीय संघ परिषदेने घेतला. रोपीय संघाच्या अर्थकारणाचे नुकसान होण्यापासून टाळण्यासाठी तात्काळ हा निणर्य घेण्यात आल्याचे युरोपीय संघाच्या या निवेदनात म्हटले आहे. युरोपीय संघाच्या या निर्णयामुळे अमेरिकेचे अध्यक्ष डोनाल्ड ट्रम्प यांच्या शांतता प्रयत्नांना थेट धक्का देऊन युक्रेन संघर्षाचे निराकरण करण्याच्या प्रयत्नांना कमजोर करण्याचा प्रयत्न केला जात आहे, असे रशियन परराष्ट्र मंत्रालयाच्या प्रवक्त्या मारिया झाखारोवा यांनी एका प्रसिद्धीपत्रकात म्हटले आहे. युरोपीय संघाच्या उपाययोजनांविरोधात सविस्तर उपाय योजनांची आखणी आगोदरच करण्यात आली आहे. बँक ऑफ रशियाकडून शुक्रवारीच हेसविस्तर निवेदन प्रसिद्ध करण्यात आल्याचेही त्यांनी सांगितले. मॉस्कोमधील लवादाच्या माध्यमातून या संदर्भात एक खटला दाखल करण्याची तयारी देखील करण्यात आल्याचे झाखारोवा यांनी म्हटले आहे. रशियाच्या मालकीची ५०० ते ८०० अब्ज डॉलरची मालमत्ता युरोपात असून युरोपीय संघाकडून ही मालमत्ता गोठवण्यात येणार असल्याचे स्थानिक माध्यमांनी म्हटले आहे.
