Epstein files | Narendra Modi | Prithviraj Chavan – एपस्टीन फाइल्समध्ये आजी- माजी खासदारांची नावे असून याबाबत आपण याआधीच खुलासा केला होता. पंतप्रधान नरेंद्र मोदींसह पेट्रोलियम मंत्री हरदीपसिंह पुरी, उद्योजक अनिल अंबानी यांच्यासह काही नावे ई-मेलमधून पुढे येत आहेत. एपस्टीन फाईलमध्ये २०१४ चा संदर्भ असून मोदी आणि एपस्टीन यांच्या नात्याबाबत सरकारने स्पष्ट खुलासा करावा, असे आव्हान काँग्रेस नेते व माजी मुख्यमंत्री पृथ्वीराज चव्हाण यांनी सरकारला दिले आहे. कराड येथील निवासस्थानी शनिवारी आयोजित पत्रकार परिषदेत ते बोलत होते. पृथ्वीराज चव्हाण म्हणाले, ‘एपस्टीन फाइल उघड करण्याची प्रक्रिया सुरू झाली असून त्या टप्प्याटप्प्याने सार्वजनिक केल्या जाणार आहेत. अमेरिकन संसदने सांगितले की, एपस्टीन फाईलमध्ये 300 जीबी डेटा असून सर्व माहिती उघड होण्यास काही आठवडे लागतील. ट्रम्प यांचे अनेक फोटोग्राफ, व्हिडिओग्राफ आहेत. ते दाबण्याची किंवा मागे ठेवण्याची शक्यता आहे. मात्र, राष्ट्रपतींचे नावही या प्रकरणात असण्याची शक्यता नाकारता येत नाही. त्यामुळे अमेरिकन सरकार व राष्ट्रपती यांच्यात संघर्ष होण्याचा संशय आहे. एपस्टीन फाइल प्रकरणाचा भारताच्या राजकारणावर गंभीर आणि दूरगामी परिणाम होण्याची शक्यता असून काही भारतीयांची नावे समोर येत आहेत. दि. १ डिसेंबर रोजी संवाद साधताना मी एपस्टीन फाइल प्रकरण खुले झाल्यानंतर त्याचे भारतावर परिणाम होतील का, असा प्रश्न उपस्थित केला होता. त्यावेळी माझ्याकडे ठोस पुरावे नसल्याने मी कोणाचेही नाव घेतले नव्हते. मात्र, आता काही पुरावे पुढे आले असून त्यामध्ये मोठ्या आणि प्रभावी व्यक्तींचा सहभाग असण्याची शक्यता दिसून येत आहे. सध्या समोर आलेल्या ई- मेल्समध्ये काही भारतीयांचा उल्लेख येत आहे. डोनॉल्ड ट्रम्प यांचे माजी सल्लागार स्टीव्ह बॅनन यांना मोदींना भेटायचे होते. आज उघड झालेल्या एका मेलमध्ये एपस्टीन यासंदर्भाची हमी देत होता. एपस्टीनच्या एका मेलमध्ये मोदी आणि बॅनन भेट घडवू, असा उल्लेख येत आहे. एपस्टीन फाइलमध्ये मोदींचा 2014 चा संदर्भ आहे. मोदी व एपस्टीन यांच्या नात्याचा सरकारने खुलासा करावा. पेट्रोलियंम मंत्री हरदीप पुरी, उद्योगपती अनिल अंबानी आणि काही भारतीयांची नावे समोर येत आहेत. मात्र, यासंदर्भातील आक्षेपार्ह छायाचित्रे अद्याप समोर आलेली नाहीत, अशी माहिती चव्हाण यांनी दिली. सविस्तर विश्लेषण लवकरच येईल अमेरिकन मीडियाकडून या प्रकरणाचा शोध सुरू असून भारतीय मीडियाही तपास करत आहे. अमेरिकन सरकारने स्वतंत्र ‘एपस्टीन फाइल ट्रान्सपरन्सी’ या वेबसाईटवर ही माहिती सार्वजनिक केली असून प्रचंड प्रमाणात डिजिटल सामग्री उपलब्ध झाली आहे. या सर्व माहितीचे विश्लेषण करण्यास काही काळ लागणार असून जगभरातील आंतरराष्ट्रीय पत्रकार या प्रकरणाचा सखोल अभ्यास करत आहेत. लवकरच याचे सविस्तर विश्लेषण समोर येईल, असा दावा पृथ्वीराज चव्हाण यांनी केला. …तर सहभाग नाकारुन बचाव करतील! पुरावे समोर आल्यानंतर संबंधित व्यक्ती आपला सहभाग नाकारतील, फोटो मॉर्फ केले असतील, व्हिडिओमध्ये फेरफार केला असेल, असे बचाव पुढे आणले जातील. मात्र, अखेरीस जनतेच्या न्यायालयात सत्य समोर येईल. अशा व्यक्तींवर आणि अशा सरकारवर देशाची सूत्रे पुढे चालवायची का, हा विचार भारताच्या जनतेला करावा लागेल, असेही पृथ्वीराज चव्हाण यांनी यावेळी सांगितले.
