Election News – मुंबई महानगरपालिकेवर भगवा फडकविण्यासाठी भाजप व शिंदेसेनेने तयारी सुरु केली आहे. दोन्ही पक्षांमध्ये जागा वाटपाची बोलणीची पहिली फेरी देखील झाली असून दोन्ही पक्षांनी सर्व प्रभागातील इच्छूक असलेल्या उमेदवारांच्या मुलाखती देखील पूर्ण केल्या आहेत. दोन्हीपक्षातील कार्यकर्ते ठामपणाने युती होणार असे जरी सांगत असले तरी देखील शिंदेसेनेने सावध भूमिका घेताना, पूर्ण 227 उमेदवारांच्या मुलाखती घेतल्या आहेत. पहिल्या फेरीत सर्वच जागांवर चर्चा झाल्याची माहिती आहे. यामध्ये दोन्ही पक्षांचे जवळपास 150 जागांवर एकमत झाल्याचे कळले आहे. मात्र अजूनही तब्बल 70 जागांचा तिढा कायम असल्याचे दिसून आले आहे. एकमत झालेल्या जागांमध्ये 57 जागा शिंदेसेनेला देण्यात आल्या असून अजून 15-20 जागा मिळू शकतील. असे झाल्यास सुमारे 150 पेक्षा अधिक जागांवर भाजप लढेल. मात्र, पहिल्या फेरीनूसार मिळालेल्या 57 व अजून मिळणार्या 15-20 अशा साधारण 75 ते 80 जागांवर शिंदेसेना सामाधानी नसल्याने उमेदवारांमध्ये अस्वस्थता असल्याचे चित्र आहे. शिंदेसेनेकडे 2017 च्या निवडणूकीत जिंकलेले 57 नगरसेवक असून अन्य पक्षातील नगरसेवकांना देखील प्रवेश देण्यात आला आहे. त्यामुळे आयात केलेल्या उमेदवारांना तिकिटाची खात्री नसल्यास ते उद्धवसेनेते किंवा इतरपक्षात उडी मारू शकतात. त्यामुळे ऐन निवडणूकीवेळी मोठ्या प्रमाणात बंडखोरीचा शिंदेसेनेला सामना करावा लागू शकतो. त्यामुळेच युतीमध्ये एकत्र 100 पेक्षा कमी जागा लढवण्यापेक्षा स्वबळावर निवडणूक लढविल्यास, इच्छूकांना संधी देता येवू शकेल, असे शिंदेसेनेतील एका गटाचे म्हणने आहे. याबरोबरीने मिळणार्या 75 – 80 जागांपैकी काही ठिकाणी शिंदेसेनेची ताकद नाही. त्यामुळे मिळालेल्या जागांमधून पूर्वीच्या 57 जागा देखील टिकवणे अवघड असल्याचे एका गटाचे म्हणने असल्याने, त्यांनी स्वबळासाठी आग्रह धरला आहे. भाजपने ऐनवेळी युतीतून माघार घेतल्यास, अडचण येवू नये, या सर्व गोष्टींचा विचार करुनच शिंदेसेनेचे सर्वच्या सर्व 227 जागांसाठी इच्छूक उमेदवारांच्या मुलाखती घेतल्या आहेत. त्यामुळे शिंदेसेना सावध भूमिकेतून वावरत आहे. जागावाटप अजूनही पूर्ण झाले नसल्याने दोन्ही पक्षांनी सावधगिरीची भूमिका घेतली आहे.
