Ranveer Singh | Don 3 movie – सध्या संपूर्ण देशात अभिनेता रणवीर सिंगच्या ‘धुरंधर’ या स्पाय थ्रिलर चित्रपटाने बॉक्स ऑफिसवर अक्षरशः वादळ निर्माण केले आहे. या सिनेमानं आतापर्यंत ५५० कोटींहून अधिक रुपयांची कमाई करत यशाचे नवे शिखर गाठले असून, रणवीरच्या अभिनयाचे सर्वत्र कौतुक होत आहे. मात्र, या यशाच्या आनंदासोबतच रणवीरने एक असा निर्णय घेतला आहे, ज्यामुळे त्याचे चाहते थक्क झाले आहेत. ‘डॉन ३’ मधून रणवीरची एक्झिट! मिळालेल्या माहितीनुसार, रणवीर सिंगने फरहान अख्तरच्या बहुप्रतिक्षित ‘डॉन ३’ मधून बाहेर पडण्याचा मोठा निर्णय घेतला आहे. ‘धुरंधर’च्या प्रचंड यशानंतर रणवीरला आता पुन्हा तशाच धाटणीच्या गुन्हेगारी पार्श्वभूमी असलेल्या कथांमध्ये रस उरलेला नाही. त्याला आता संजय लीला भन्साळी, लोकेश कनगराज आणि अटली यांसारख्या भव्य मांडणी करणाऱ्या दिग्दर्शकांसोबत काम करून आपली कारकीर्द नव्या उंचीवर नेण्याची इच्छा आहे. याच कारणामुळे त्याने ‘डॉन’च्या साम्राज्यातून माघार घेतली असल्याचं सांगण्यात आलं आहे. आता ‘या’ सिनेमात झळकणार अभिनेता? ‘डॉन ३’ नाकारल्यानंतर रणवीरने आपला मोर्चा दिग्दर्शक जय मेहता यांच्या ‘प्रलय’ या चित्रपटाकडे वळवला आहे. हा चित्रपट भारतीय सिनेमात फारसा न हाताळलेला ‘झॉम्बी-थ्रिलर’ प्रकारातील असेल. अत्यंत कठीण परिस्थितीत आपल्या कुटुंबाला वाचवण्यासाठी एक सामान्य माणूस किती टोकाला जाऊ शकतो, याचे थरारक चित्रण या चित्रपटात पाहायला मिळेल. या प्रोजेक्टसाठी रणवीर स्वतः उत्सुक असून, तो स्वतःच्या तारखांचे नियोजन करत आहे, त्यामुळे ‘प्रलय’चे शूटिंग अपेक्षेपेक्षा लवकर सुरू होण्याची शक्यता आहे. पुढचा ‘डॉन’ कोण? निर्मात्यांसमोर मोठा पेच…. रणवीर सिंगने माघार घेतल्यामुळे आता ‘डॉन ३’ च्या भवितव्यावर प्रश्नचिन्ह निर्माण झाले आहे. अमिताभ बच्चन आणि शाहरुख खान यांच्यानंतर या आयकॉनिक भूमिकेसाठी तोडीस तोड अभिनेता शोधण्याचे मोठे आव्हान निर्माते फरहान अख्तर आणि रितेश सिधवानी यांच्यासमोर उभे राहिले आहे. त्यामुळे आता डॉन ची भुमीका कोण साकारणार? हे पाहणे महत्वाचे ठरणार आहे.
