Dharmendra | narendra modi | draupadi murmu : हिंदी चित्रपटसृष्टीतील ‘ही-मॅन’ आणि दिग्गज अभिनेते धर्मेंद्र यांचे निधन झाले आहे. 89 वर्षांच्या या व्यक्तीने मुंबईतील त्यांच्या राहत्या घरी अखेरचा श्वास घेतला. गेल्या काही दिवसांपासून ते आजारी होते आणि रुग्णालयातही दाखल होते त्यानंतर त्यांना घरी सोडण्यात आले होते. तेव्हापासून ते त्यांच्या कुटुंबासोबत त्यांच्या घरी वेळ घालवत होते. मात्र, सोमवारी (दि. 24 ) सकाळी त्यांचे निधन झाले. ऑक्टोबर महिन्यात श्वास घेण्यास त्रास झाल्याने त्यांना ब्रीच कँडी रुग्णालयात दाखल करण्यात आले होते. 12 नोव्हेंबरला डिस्चार्ज मिळाल्यानंतर त्यांच्यावर घरीच उपचार सुरू होते. मात्र प्रकृती अचानक खालावल्यानंतर आज त्यांचे निधन झाले आहे. दरम्यान, पंतप्रधान नरेंद्र मोदी यांनी धर्मेंद्र यांच्या निधनावर शोक व्यक्त केला आहे. सोशल मीडियावर त्यांनी पोस्ट शेअर केली आहे. “धर्मेंद्रजींचे निधन हे भारतीय चित्रपटसृष्टीच्या एका संपूर्ण युगाचा अंत आहे. ते अद्वितीय व्यक्तिमत्त्वाचे आणि अत्यंत प्रतिभावान कलाकार होते. त्यांच्या साधेपणाने, विनम्रतेने आणि आत्मीयतेने त्यांनी लाखो-कोट्यवधी चाहत्यांची मने जिंकली. त्यांच्या परिवाराला, मित्रपरिवाराला आणि सर्व चाहत्यांना माझ्या संवेदना. ॐ शांती.” राष्ट्रपती द्रौपदी मुर्मू यांचा हळहळ व्यक्त करणारा संदेश : राष्ट्रपती द्रौपदी मुर्मू यांनीही श्रद्धांजली वाहताना म्हटले, “ज्येष्ठ अभिनेते आणि माजी खासदार धर्मेंद्रजींचे निधन भारतीय सिनेसृष्टीसाठी अपूरणीय हानी आहे. त्यांच्या दशकेभर चाललेल्या चमकदार कारकिर्दीत त्यांनी अनेक अविस्मरणीय भूमिका साकारल्या. त्यांनी मागे ठेवलेली समृद्ध परंपरा नव्या पिढीच्या कलाकारांना सतत प्रेरित करत राहील.” असं राष्ट्रपती द्रौपदी मुर्मू यांनी म्हंटलं आहे. बॉलिवूडमध्ये शोककळा : धर्मेंद्र यांच्यावर अंतिम संस्कार मुंबईतील विले पार्ले स्मशानभूमीत करण्यात आले. त्यांच्या मोठ्या मुलगा सनी देओल यांनी मुखाग्नि दिली. यावेळी हेमा मालिनी, ईशा देओल, अमिताभ बच्चन, सलमान खान, आमिर खान आणि चित्रपटसृष्टीतील अनेक दिग्गज कलाकारांनी उपस्थित राहून त्यांना शेवटचा निरोप दिला. सोशल मीडियावरही चाहत्यांनी आणि सेलिब्रिटींनी भावपूर्ण श्रद्धांजली व्यक्त केली आहे.
