Karnatka | IPS Ramachandra Rao – सध्या संपूर्ण देशात एका व्हिडिओने चांगलीच खळबळ उडवली आहे. हा व्हिडिओ कर्नाटकचे पोलीस महासंचालक डॉ. रामचंद्र राव यांचा असून, यामध्ये ते महिलांसोबत गैरवर्तन करत असल्याचं दिसून येत आहे. शासकीय कार्यालयातच हा प्रकार घडल्याचा आरोप होत असून, या घटनेवर नागरिकांसह विविध स्तरांतून तीव्र संताप व्यक्त करण्यात येत आहे. या प्रकरणाची तातडीने दखल घेत कर्नाटक सरकारने रामचंद्र राव यांना निलंबित केले आहे. तसेच मुख्यमंत्री सिद्धरामय्या यांनी या घटनेची सखोल चौकशी करण्याचे आदेश दिले आहेत. दरम्यान, रामचंद्र राव यांनी मात्र व्हायरल व्हिडिओ खोटे व बनावट असल्याचा दावा करत सर्व आरोप फेटाळून लावले आहेत. मात्र, हे संपूर्ण प्रकरण नेमकं काय आहे? आणि रामचंद्र राव यांच्या बद्दल जाणून घेणार आहोत…. महिलांना मिठी आणि चुंबन घेतानाचा व्हिडिओ व्हायरल : समाजमाध्यमांवर व्हायरल होत असलेल्या एका कथित व्हिडिओमध्ये रामचंद्र राव हे कर्तव्यावर असताना महिलांना मिठी मारताना आणि चुंबन घेताना दिसत असल्याचा दावा केला जात आहे. व्हायरल व्हिडिओमध्ये आयपीएस अधिकारी कपडे बदलत असल्यासारखे महिला बदलताना स्पष्टपणे दिसत आहे. डॉ. रामचंद्र राव त्यांच्या कार्यालयात पोलिसांचा गणवेश परिधान करून या कामांमध्ये सहभागी असल्याचे दिसून आले आहे. ही घटना व्यावसायिक नीतिमत्ता, शिस्त आणि सरकारी कार्यालयाच्या गैरवापराबद्दल गंभीर प्रश्न उपस्थित करते. व्हिडिओ व्हायरल झाल्यानंतर, बरेच लोक याला संस्थात्मक प्रतिष्ठेचे गंभीर उल्लंघन मानत आहेत. दरम्यान, हा व्हिडिओ शासकीय कार्यालयातच गुप्तपणे चित्रीत करण्यात आल्याचा आरोप असून, वर्दीतील वरिष्ठ पोलीस अधिकाऱ्यांकडून झालेल्या कथित गैरवर्तनामुळे पोलीस दलाच्या प्रतिमेवर गंभीर प्रश्नचिन्ह उपस्थित झाले आहे. आरोपांचे खंडन, फॉरेन्सिक चौकशीचे आदेश : राज्य सरकारच्या आदेशानुसार, चौकशी पूर्ण होईपर्यंत रामचंद्र राव यांना निलंबित करण्यात आले असून, राज्य सरकारची लेखी परवानगी घेतल्याशिवाय मुख्यालय सोडण्यास मनाई करण्यात आली आहे. सरकारने स्पष्ट केले आहे की, या घटनेमुळे कर्नाटक पोलीस दलाची प्रतिमा मलीन झाली आहे. दुसरीकडे, रामचंद्र राव यांनी सर्व आरोप फेटाळून लावत, व्हायरल होत असलेले व्हिडिओ छेडछाड करून तयार करण्यात आल्याचा दावा केला आहे. या पार्श्वभूमीवर आता फॉरेन्सिक प्रयोगशाळेमार्फत व्हिडिओची सत्यता तपासली जाणार आहे. या प्रकरणामुळे कर्नाटकमध्ये संतापाची लाट उसळली आहे. कोण आहेत रामचंद्र राव? डॉ. के. रामचंद्र राव हे कर्नाटक केडरचे आयपीएस अधिकारी आहेत आणि सध्या त्यांच्याकडे पोलिस महासंचालक (डीजीपी) पद आहे. त्यांचा जन्म ७ मे १९६६ रोजी आंध्र प्रदेशात झाला. रामचंद्र राव हे उच्चशिक्षित आहेत, त्यांनी एम.एससी. आणि नंतर पीएचडी केली आहे. अभ्यासानंतर त्यांनी यूपीएससी सिव्हिल सर्व्हिसेस परीक्षेची तयारी केली आणि १९९३ मध्ये त्यांची आयपीएससाठी निवड झाली. ४ सप्टेंबर १९९४ रोजी त्यांची कर्नाटक केडरमध्ये नियुक्ती झाली. रामचंद्र राव हे १९९३ बॅचचे कर्नाटक केडरचे आयपीएस अधिकारी आहेत. यापूर्वी त्यांनी दक्षिण विभागाचे पोलीस महानिरीक्षक म्हणूनही काम पाहिले आहे. मात्र, त्यांची कारकीर्द अनेकदा वादग्रस्त घटनांमुळे चर्चेत राहिली आहे. २०१४ मध्ये म्हैसूरजवळील येळवळ परिसरात झालेल्या एका रोख रक्कम जप्ती प्रकरणात त्यांचे नाव समोर आले होते. केरळकडे जाणाऱ्या खासगी बसमधून २० लाख रुपये जप्त केल्याचा पोलिसांचा दावा होता, तर व्यापाऱ्यांनी प्रत्यक्षात २.२७ कोटी रुपयांची लूट झाल्याचा आरोप केला होता. या प्रकरणात राव यांनी कोणताही गैरप्रकार झाल्याचे नाकारले होते; मात्र, त्यावेळी छाप्यात सहभागी असलेल्या एका अधिकाऱ्यानेच त्यांच्यावर गंभीर आरोप केले होते. राण्या राव आणि सोन्याच्या तस्करीचा वाद : रामचंद्र राव हे दाक्षिणात्य अभिनेत्री राण्या राव (हर्षवर्धिनी राण्या) हिचे सावत्र वडील आहेत. यापूर्वी सोन्याच्या तस्करी प्रकरणात आपल्या सावत्र मुलीला मदत केल्याचा आरोप त्यांच्यावर झाला होता. या प्रकरणानंतर त्यांना सक्तीच्या रजेवर पाठवण्यात आले होते. सध्या राण्या राव बेंगळुरू येथील मध्यवर्ती कारागृहात शिक्षा भोगत आहे. मात्र, सोने तस्करी प्रकरणात आपल्या सावत्र वडिलांचा कोणताही सहभाग नसल्याचे राण्याने स्पष्ट केले होते. त्यानंतर राज्य सरकारने आदेश मागे घेत रामचंद्र राव यांची पुन्हा वरिष्ठ पदावर नियुक्ती केली होती. रान्या दुबईहून परतत असताना तिच्याकडे १४.२ किलोग्रॅम सोने सापडले, ज्याची किंमत अंदाजे ₹१२.५६ कोटी (अंदाजे १.२५६ दशलक्ष अमेरिकन डॉलर्स) आहे. हे सोने एका पट्ट्यात लपवून ठेवण्यात आले होते. त्यात १४ किलोग्रॅम सोन्याच्या बार आणि ८०० ग्रॅम सोन्याचे दागिने होते.
