तिजोरीच्या चाव्यावरून महायुतीमध्ये घमासान! आता रुपाली चाकणकर मैदानात थेट म्हणाल्या “….त्यामुळे मतं तुमचं निधी…”

Rupali Chakankar : राज्यात स्थानिक स्वराज्य संस्थांच्या निवडणुकीतील पहिल्या टप्प्यासाठी येत्या २ डिसेंबर २०२५ रोजी मतदान होणार आहे. ही निवडणूक राज्यातील २४६ नगरपरिषदा आणि ४२ नगरपंचायतींसाठी होणार आहे. जास्तीत जास्त उमेदवार निवडून आणण्यासाठी महायुती आणि महाविकास आघाडीतील पक्ष प्रयत्नशील आहेत. महायुतीच्या बड्या नेत्यांकडून जोरदार प्रचार केला जात आहे. बहुतांशी ठिकाणी महायुतीमधील तिनही प्रमुख घटक पक्ष निवडणुकीसाठी स्वतंत्र लढत असल्याने रंगत वाढलेली आहे.

उपमुख्यमंत्री आणि राष्ट्रवादी काँग्रेस पक्षाचे राष्ट्रीय अध्यक्ष अजित पवार स्वतः मैदानात उतरले आहेत. नुकतेच त्यांनी एका सभेत केलेल्या विधानाची जोरदार चर्चा होत आहे. “तुम्ही राष्ट्रवादी काँग्रेस पार्टीच्या उमेदवारांना मतदान करा, तुमच्या भागाला निधी कमी पडू देणार नाही. तुमच्या हातात मत आहे, तर माझ्या हातात निधी आहे,” असे विधान अजित पवार यांनी केले होते. त्यांनी केलेल्या या विधानावर भाजप मंत्री चंद्रकांत पाटील यांनी अजित पवारांना टोला लगावला.

रुपाली चाकणकर काय म्हणाले?

यामुळे आता निधीच्या चाव्यावरून राजकारण रंगले असतानाच राष्ट्रावादी काँग्रेस पक्षाच्या महिला नेत्या आणि राज्य महिला आयोगाच्या अध्यक्षा रुपाली चाकणकर मैदानात उतरल्या आहेत. राज्यात आपली सत्ता आहे आणि तिजोरीच्या आपल्या हातात चाव्या आहेत. अर्थमंत्री आपला आहे, मत तुमचं निधी आमचा असेल, असे वक्तव्य रुपाली चाकणकर यांनी कुर्डूवाडीतील जाहीर सभेत केले आहे.

त्यांनी केलेल्या विधानामुळे पुन्हा एकदा तिजोरीच्या चाव्यावरून महायुतीमध्ये घामासान सुरू होण्याची शक्यता आहे. निधीशिवाय कोणतीही कामे होत नाहीत-त्यामुळे मतं तुमचं निधी आमचा असेल कुर्डूवाडीच्या विकासासाठी निधी कमी पडणार नाही, असे देखील रुपाली चाकणकर यावेळी बोलताना म्हणाल्या आहेत.

चंद्रकांत पाटलांचे प्रत्युत्तर

“तुमच्या हातात तिजोरीच्या चाव्या असल्या तरी त्या तिजोरीचा मालक आमच्याकडे आहे. मालकाच्या परवानगीशिवाय तिजोरी उघडता येत नाही, आणि जर का ती उघगडली तर त्याला काय म्हणतात हे तुम्हाला माहिती आहे,” असा खोचक टोला चंद्रकांत पाटील यांनी अजित पवार यांना लगावला आहे. कोल्हापूरच्या गडहिंग्लजमध्ये प्रचार सभेत संबोधित करताना पाटलांनी अजित पवारांच्या विधानावर भाष्य करत हे विधान केले.

हेही वाचा : पंतप्रधान मोदींचा अयोध्येत रोड शो…भगवान राम-माता सीतेची पूजा ; थोड्याच वेळात भगवा ध्वज फडकवणार