मुंबई : भाजपच्या नेत्या पंकजा मुंडे यांचा पीए अनंत गर्जे यांची पत्नी डॉ. गौरी पालवे गर्जे हिने फेब्रुवारी २०२५ मध्ये लग्नानंतर अवघ्या काही महिन्यांत मुंबईतील राहत्या सदनिकेत गळफास घेऊन जीवन संपवलं. या प्रकरणात अनंत गर्जे यांच्यावर वरळी पोलीस ठाण्यात आत्महत्येस प्रवृत्त केल्याचा गुन्हा दाखल आहे. घर शिफ्टिंगदरम्यान गौरीला काही जुनी कागदपत्रे सापडली होती, यामध्ये एका महिलेच्या गर्भपाताशी संबंधित कागदपत्रांवर नवऱ्याचे नाव “अनंत गर्जे” असे नमूद होते. यामुळेच दोघांमध्ये सतत वाद होत असल्याचा दावा सामाजिक कार्यकर्त्या अंजली दमानिया यांनी केला होता. आता या प्रकरणात महत्त्वाची घडामोड समोर आली आहे. अनंत गर्जे यांची जुनी प्रेयसी वरळी पोलीस ठाण्यात हजर झाली असून तिने आपला जबाब नोंदवला आहे. तिने स्पष्ट केले की, “२०२२ पासून माझा अनंत गर्जे यांच्याशी कोणताही संबंध नाही. गौरीला सापडलेली गर्भपाताची कागदपत्रे मला माहिती नाहीत आणि त्याबाबत मला काहीही माहीत नाही.” असं तिने सांगितले आहे. दरम्यान, गौरीच्या मृतदेहासह रुग्णालयात पोहोचलेल्या अनंत यांच्या शरीरावर किरकोळ जखमा आढळल्या होत्या. पोतदार रुग्णालयात गौरीला मयत घोषित केल्यानंतर अनंत यांनी स्वतःला इजा करण्याचा प्रयत्न केला होता, याचे सीसीटीव्ही फुटेज पोलिसांना मिळाले आहे. तसेच सदनिकेच्या खिडकीला जाळी बसवणाऱ्या व्यक्तीचा जबाबही पोलिसांनी नोंदवला आहे. पोलिसांनी न्यायालयात अनंत गर्जे यांची पॉलीग्राफ तसेच मानसिक तपासणी करण्याची विनंती केली होती. न्यायालयाने त्यास मंजुरी दिली असून अनंत गर्जे यांना १४ दिवसांची न्यायालयीन कोठडी सुनावली आहे. या प्रकरणाचा तपास वेगाने सुरू असून नव्याने मिळालेल्या जबाबांमुळे खरे सत्य लवकरच समोर येण्याची शक्यता आहे.
