बीड : बीडच्या मस्साजोगचे सरपंच संतोष देशमुख यांच्या हत्येला आता एक वर्षांहून अधिक काळ उलटून गेला. तरीही, अद्याप या प्रकरणाची सुनावणी बीड न्यायालयात सुरु आहे. शुक्रवारी (19 डिसेंबर) झालेल्या सुनावणीत एक महत्त्वाची माहिती समोर आली आहे. या खटल्यातून सरकारी वकील उज्ज्वल निकम यांच्यावर आक्षेप घेत त्यांना हटविण्यात यावे, अशी मागणी आरोपींनी केली आहे. ते राजकीय पक्षाशी संबंधित असल्याचे कारण देत त्यांना या खटल्यातून बाजूला करा, असा अर्ज वाल्मिक कराड आणि विष्णू चाटे वगळता इतर आरोपींनी केला आहे. सरपंच संतोष देशमुख यांच्या हत्या प्रकरणात बीड न्यायालयात सुनावणी सुरु आहे. सहकारी सरकारी वकील बाळासाहेब कोल्हे यांच्याकडून या सुनावणीच्या वेळी युक्तिवाद करण्यात आला. सुनावणीसाठी संतोष देशमुख यांचे बंधू धनंजय देशमुख उपस्थित होते. शुक्रवारी (19 डिसेंबर) सकाळी 11 वाजता सुनावणीला सुरुवात झाली. संतोष देशमुख हत्या प्रकरणातील आरोपी ज्ञानेश्वर उर्फ सुदर्शन घुले वैद्यकीय कारणास्तव या सुनावणीला गैरहजर असून इतर आरोपी मात्र व्हिसीद्वारे हजर होते. यावेळी सुनावणीवेळी न्यायाधीशांनी आरोपी घुलेचे नाव पुकारताच आरोपी सुदर्शन घुले हा चक्कर येऊन खाली पडला. पुराव्यांच्या तांत्रिक मुद्द्यांवरून आरोपींच्या वकिलांनी जोरदार युक्तिवाद केला. घटनेचे व्हिडिओ आरोपींना आधी दिले जावेत आणि त्यानंतरच आरोप निश्चिती केली जावी, अशी मागणी त्यांनी केली. जे व्हिडिओ ट्रायल कोर्टात नाहीत, ते उच्च न्यायालयात दाखवून वातावरण भावनिक केले जाते, असा आक्षेपही आरोपींच्या वकिलांनी नोंदवला. यावर सरकारी पक्षाने आजच हे व्हिडिओ फाईल्स आरोपींच्या वकिलांना देण्याचे मान्य केले.
