Aadhaar Card : आधार कार्ड आता जन्म प्रमाणपत्र किंवा जन्मतारखेचा पुरावा म्हणून स्वीकारले जाणार नाही, असे उत्तर प्रदेश सरकारने जाहीर करताना, यासंदर्भात सर्व सरकारी विभागांना यासंबंधीच्या नव्या सूचना जारी केल्या आहेत. हा निर्णय ३१ ऑक्टोबर रोजी लखनऊ येथील भारतीय विशिष्ट ओळख प्राधिकरण (युआयडीएआय) च्या प्रादेशिक कार्यालयाने जारी केलेल्या पत्राच्या आधारे घेण्यात आला. भारतीय विशिष्ट ओळख प्राधिकरणाने आधार कार्डवर नोंदवलेली जन्मतारीख अंदाजे असते, कारण आधार कार्डसाठी अर्ज करताना जन्म प्रमाणपत्रे, शाळेचे रेकॉर्ड किंवा रुग्णालयाने जारी केलेले कागदपत्रे बहुतेकदा आवश्यक नसतात. त्यामुळे, आधार कार्ड वैध जन्मदस्तू मानले जाऊ शकत नाही, असे आधीच स्पष्ट केले होते. त्यानंतर उत्तर प्रदेश सरकारच्या नियोजन विभागाचे विशेष सचिव अमित सिंह बन्सल यांनी एक आदेश जारी करताना म्हटले आहे की, अनेक विभाग आधार कार्डला जन्मतारखेचा पुरावा म्हणून मानत आहेत. मात्र हे खरे नाही. त्यामुळेच सर्व विभाग प्रमुख आणि अधिकाऱ्यांना जन्मतारखेचा पुरावा म्हणून आधार कार्ड स्वीकारू नये असे स्पष्ट निर्देश देण्यात आले असून हा आदेश तात्काळ लागू करण्यात आला आहे. जन्मतारखेच्या पुराव्यासाठी रुग्णालयाने जारी केलेले जन्म प्रमाणपत्र, उच्च माध्यमिक शाळेचे प्रमाणपत्र, महानगरपालिका किंवा नगर परिषदेचे नोंदणीकृत रेकॉर्ड व सरकारी नोकऱ्या, पेन्शन, शिष्यवृत्ती, ड्रायव्हिंग लायसन्स किंवा सरकारी योजनांसाठी आवश्यक असलेली इतर प्रामाणिक कागदपत्रे वैध धरली जाणार आहेत. कागदपत्रांची सत्यता आणि पारदर्शकता सुनिश्चित करण्यासाठी हा निर्णय घेण्यात आल्याचे सरकारचे म्हणणे आहे. आधार कार्ड आता जन्मतारखेचा पुरावा म्हणून नव्हे तर केवळ ओळखीचा पुरावा म्हणून वापरले जातील. हा नियम सर्व सरकारी अर्ज प्रक्रिया, भरती, पेन्शन, शिष्यवृत्ती आणि इतर योजनांना लागू होईल.
