Lara Dutta: पश्चिम आशियातील वाढत्या तणावामुळे सामान्य नागरिकांबरोबरच अनेक भारतीय आणि बॉलिवूड कलाकारही परदेशात अडकले आहेत. अमेरिका, इस्रायल आणि इराण यांच्यातील संघर्षाच्या पार्श्वभूमीवर दुबईसह काही भागांमध्ये तणावपूर्ण वातावरण निर्माण झाले आहे. अनेक उड्डाणे रद्द झाल्याने प्रवाशांची गैरसोय होत आहे. याच दरम्यान अभिनेत्री लारा दत्ता दुबईमध्ये अडकली असून तिने स्वतःचा व्हिडिओ शेअर करत आपली परिस्थिती सांगितली आहे. लारा दत्ता हिने इंस्टाग्रामवर पोस्ट केलेल्या व्हिडिओमध्ये स्पष्टपणे सांगितले की, “मी खोटं बोलणार नाही. हे काही दिवस खूप तणावाचे गेले आहेत. मी नर्व्हस आहे. खूप भीतीदायक वाटतंय. जोराचे स्फोटांचे आवाज ऐकू येतात.” ती पुढे म्हणाली की त्या सुरक्षित भागात राहत असल्या तरी स्फोटांच्या आवाजामुळे खिडक्या हलतात आणि दरवाजे थरथरतात. तरीदेखील तिला प्रत्यक्षात असुरक्षित वाटलेले नाही, असे तिने नमूद केले. लारा सध्या दुबईमध्ये आपल्या मुलीसोबत आहे. तिचे पती महेश भूपती कामानिमित्त दुसऱ्या देशात आहेत. या कठीण परिस्थितीतही तिने संयुक्त अरब अमिराती सरकारचे कौतुक केले आहे. स्थानिक प्रशासन परिस्थिती हाताळत असल्याचे आणि नागरिकांच्या सुरक्षेला प्राधान्य दिले जात असल्याचे तिने सांगितले. Lara Dutta लारा दत्ता भारतात परतण्याचा प्रयत्न करत आहे. सतत फ्लाइट्स बुक करण्याचा प्रयत्न सुरू असल्याचे तिने व्हिडिओत सांगितले. या काळात पाठिंबा देणाऱ्या चाहत्यांचे आणि मित्रांचे तिने आभार मानले. “या कठीण वेळी माझी विचारपूस करणाऱ्यांचे मनापासून धन्यवाद,” असे ती म्हणाली. या आधी अभिनेत्री ईशा गुप्ता अबू धाबीमध्ये अडकली होती; मात्र ती सुरक्षितपणे भारतात परतली आहे. दिल्लीमध्ये पोहोचल्यानंतर तिने भारत आणि यूएई सरकार तसेच स्थानिक अधिकाऱ्यांचे आभार मानले. त्यांच्या मदतीमुळे सुरक्षित परतता आले, असे तिने सांगितले. दरम्यान, गायक हनी सिंह देखील दुबईमध्येच आहे. त्याने सोशल मीडियावर “आम्ही सुरक्षित आहोत, काम करत आहोत,” असा संदेश देत चाहत्यांची चिंता कमी केली आहे. पश्चिम आशियातील या तणावामुळे अनेक भारतीय कुटुंबांची चिंता वाढली आहे. सणासुदीच्या काळातही भीतीचे वातावरण असल्याचे प्रवासी सांगत आहेत. अनेक जण सुरक्षित परतीची वाट पाहत आहेत. एकूणच, या संघर्षामुळे सामान्य आयुष्य विस्कळीत झाले असून भारतीय नागरिकांच्या सुरक्षिततेकडे सर्वांचे लक्ष लागले आहे.
