Lalit Modi Surrenders Indian Passport | विविध आरोपांमुळे देशातून फरार झालेले आयपीएलचे माजी अध्यक्ष ललित मोदी पुन्हा चर्चेत आले आहेत. ललित मोदी यांनी त्यांचा भारतीय पासपोर्ट परत करण्यासाठी अर्ज केला आहे. त्यांनी वानुआटु (Vanuatu) या देशाचे नागरिकत्व घेतले आहे. हा पॅसिफिक महासागरातील एका बेटावर पसरलेला छोटासा देश आहे. मोदींवर मनी लाँड्रिंग आणि परकीय चलन कायद्यांचे उल्लंघन केल्याचा आरोप आहे. एजन्सींपासून वाचण्यासाठी ते 2010 मध्येच भारतातून पळून गेले होते. त्यांनी आता दुसऱ्या देशाचे नागरिकत्व घेतले आहे. त्यामुळे प्रत्यार्पण आणखी कठीण होणार आहे. ललित मोदींच्या पासपोर्ट परत करण्याबाबत परराष्ट्र मंत्रालयाचे प्रवक्ते रणधीर जयस्वाल यांनी माहिती दिली आहे. त्यांनी सांगितले की, मोदींनी लंडनमधील भारतीय उच्चायुक्तालयात पासपोर्ट जमा करण्यासाठी अर्ज केला आहे. आम्ही त्याच्याविरुद्धच्या खटल्याचा कायदेशीरदृष्ट्या पूर्ण पाठपुरावा करत राहू, असेही ते म्हणाले. ललित मोदी बऱ्याच काळापासून लंडनमध्ये राहत असल्याचे सांगितले जाते. त्यांनी 30 डिसेंबर 2024 लाच वानुआटुचे नागरिकत्व घेतले आहे. याआधी मेहुल चोक्सीने देखील अँटिग्वाचे नागरिकत्व घेतले होते. ललित मोदींवर परकीय चलन उल्लंघन आणि 2009 च्या आयपीएलसाठी वर्ल्ड स्पोर्ट्स ग्रुपसोबत 425 कोटी रुपयांच्या टीव्ही हक्कांच्या कराराच्या संदर्भात विविध एजन्सींकडून चौकशी सुरू आहे. परकीय चलन उल्लंघनाशी संबंधित प्रकरणांमध्ये मुंबईत आयकर आणि ईडी अधिकाऱ्यांसोबत फक्त एकदाच चौकशी सत्राला उपस्थित राहिल्यानंतर, ते मे 2010 ला ब्रिटनला पळून गेले. 2008 मध्ये आयपीएल सुरू करण्याचे श्रेय दिले जाते.
