शिक्रापूर : देशभरात सध्या सायबर गुन्हेगारी व त्या माध्यमातून आर्थिक फसवणुकीचे जाळे वाढत असताना देशभरातील नागरिकांची फसवणूक करून ऑनलाइन पद्धतीने घेतलेली लाखो रुपयांची रक्कम हि शिरूर तालुक्यातील एका बँक शाखेमध्ये जमा होत असल्याचे निदर्शनास आल्याने शिरूर पोलिसांकडून एस बँक शाखेतील एका अज्ञात खातेदाराविरुद्ध गुन्हा दाखल करण्यात आला आहे.

शिरूर पोलीस स्टेशनमधील सायबर पोर्टलचे कामकाज पाहणारे पोलीस शिपाई सोनू तावरे हे नागरिकांनी सायबर पोर्टलवर नोंदवलेल्या तक्रारींची चौकशी करत असताना सायबर फसवणूक करणाऱ्यांकडून नागरिकांना शेअर मार्केट, जॉब ऑफर, आर्थिक गुंतवणूक किंवा एखादा गुन्हा तुमच्याकडून घडला असल्याचे भासवून ऑनलाइन पद्धतीने पैसे उकळत असल्याचे पोलीस शिपाई सोनू तावरे यांच्या लक्षात आले.

ऑनलाइन पद्धतीने आलेल्या काही तक्रारींची सखोल चौकशी करत असताना सदर सायबर गुन्हेगार हे एखाद्या ठराविक बँक खात्यावर रक्कम घेऊन नंतर सायबर गुन्हेगार हे सदर रक्कम एटीएम किंवा चेकद्वारे काढून घेत असल्याचे निदर्शनास आले. तर पोलीस शिपाई सोनू तावरे यांनी याबाबत वापरल्या जाणाऱ्या बँक खात्याची सखोल चौकशी केली असता या कामासाठी वापरले जाणारे बँक खाते हे शिरूर शहरातील एस बँक शाखेत असल्याचे उघड झाले.

सदर बँक खात्याची चौकशी केली असता १९ जुलै पूर्वी त्या बँक खात्यावर लाखो रुपये जमा झाल्याचे दिसून आले असून त्या बँक खात्याबाबत देखील सात सायबर तक्रारी असल्याचे निष्पन्न झाले. याबाबत शिरूर पोलीस स्टेशनचे पोलीस शिपाई सोनू मुरलीधर तावरे वय ३० वर्षे रा. शिरूर ता. शिरूर जि. पुणे यांनी शिरूर पोलीस स्टेशन येथे दिलेल्या फिर्यादीवरून पोलिसांनी एस बँक शाखेतील अज्ञात खातेदाराविरुद्ध गुन्हा दाखल केला असून पुढील तपास पोलीस निरीक्षक विनोद पाटील हे करत आहे.