Lakhpati Didi Scheme । आगामी विधानसभा निवडणुकीच्या पार्श्वभूमीवर सर्वच राजकीय पक्षांनी आपली ताकद सिद्ध करण्याची तयारी सुरू केली आहे. कार्यकर्त्यांचे संघटन असो किंवा ‘लाडकी बहीण योजने’ची महिलांना माहिती देणे असो, प्रत्येक पक्ष आपली रणनीती अधिक धारदार करत आहे. त्यातच आता पंतप्रधान नरेंद्र मोदी हे देखील राज्यात पक्षाची ताकद वाढवण्यासाठी येत आहेत.  येत्या २५ तारखेला पंतप्रधान नरेंद्र मोदी हे जळगाव दौऱ्यावर येणार आहेत. याठिकाणी त्यांच्या उपस्थितीत राज्यस्तरीय ‘लखपती दीदी’ महिला संमेलनाचे आयोजन करण्यात आले आहे.

कसा असेल पंतप्रधान मोदींचा कार्यक्रम? Lakhpati Didi Scheme ।
पंतप्रधान नरेंद्र मोदी रविवारी सकाळी ९.०५ वाजता दिल्ली विमानतळावरून जळगावला रवाना होतील. सकाळी ११ वाजता ते संभाजीनगर विमानतळावर पोहोचतील आणि तेथून हेलिकॉप्टरने जळगाव विमानतळाकडे रवाना होतील. सकाळी 11.50 वाजता ते जळगाव विमानतळावर पोहोचतील. यानंतर, दुपारी ‘लखपती दीदी’ संमेलनाचे ठिकाण असलेल्या प्राइम इंडस्ट्रियल पार्कमध्ये पोहोचतील, तेथे ते 12:00 ते 1:30 या वेळेत उपस्थितांना संबोधित करतील. कार्यक्रम आटोपल्यानंतर दुपारी 1.35 वाजता ते जळगाव विमानतळाकडे रवाना होतील.

उद्धव ठाकरे अन् शरद पवारांवर काय बोलणार? Lakhpati Didi Scheme ।
लोकसभा निवडणुकीत महाविकास आघाडीच्या (एमव्हीए) चांगल्या कामगिरीनंतर शरद पवार आणि उद्धव ठाकरे एनडीएला वारंवार आव्हान देत आहेत. अशा स्थितीत या दौऱ्यात मोदी ठाकरे आणि पवारांवर निशाणा साधण्याची शक्यता आहे. विधानसभा निवडणुका जवळ आल्या आहेत. त्यात एनडीए आपल्या योजनांद्वारे मतदारांपर्यंत पोहोचण्याचा प्रयत्न करत आहे, विशेषत: महाराष्ट्रात सत्ता टिकवण्यासाठी.

विधानसभा निवडणुकीपूर्वी मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांनी संयुक्तपणे महाराष्ट्र दौरा सुरू केला आहे. दुसरीकडे शरद पवार आणि राज ठाकरे हेही राज्यातील विविध गावांना भेटी देऊन पक्ष मजबूत करण्यात व्यस्त आहेत. 22 ऑगस्ट रोजी कोल्हापुरात माता अंबादेवीचे दर्शन घेऊन एकनाथ शिंदे यांनी निवडणूक प्रचाराला सुरुवात केली.