Kurnewadi Robbery – माण तालुक्यातील कुरणेवाडी परिसरात मिसाळवस्ती येथे सोमवारी (दि. ४) मध्यरात्री साडेबारा ते दीडच्या सुमारास एका शेतकरी कुटुंबावर सशस्त्र दरोडा टाकत चोरट्यांनी अक्षरशः दहशत निर्माण केली. या घटनेने संपूर्ण परिसर हादरला आहे. कुरणेवाडी मिसाळ वस्ती येथील शेतकरी प्रल्हाद मिसाळ व त्यांची पत्नी सुला मिसाळ शेतात बांधलेल्या घरात राहतात. तोंडाला रुमाल, अंगात रेनकोट व डोक्यावर टोपी घातलेल्या २० ते २५ वर्षे वयोगटातील तब्बल आठ सशस्त्र दरोडेखोरांनी घरात घुसून थेट हल्ला चढवला. घरात प्रवेश करताच दरोडेखोरांनी शस्त्रांचा धाक दाखवत कुटुंबीयांना बेदम मारहाण केली. पत्नीने आरडाओरड केल्यामुळे संतप्त दरोडेखोरांनी चाकूचा धाक दाखवत तिला मारहाण केली. प्रल्हाद मिसाळ यांच्यावर चाकूने वार करून इलेक्ट्रॉनिक पिस्तुलद्वारे धक्का (करंट) देण्याचा प्रयत्न केला. मारून टाकू, अशा धमक्या देत या नराधमांनी दहशतीचे वातावरण निर्माण केले. यानंतर दरोडेखोरांनी घरातील देवघर फोडून व कपाट उचकून सुमारे तीन तोळे सोने, मंगळसूत्र, बाळ्या, चांदीचे कडे, अंगठी तसेच रोख रक्कम अंदाजे ३५ हजारांचा मुद्देमाल जबरीने लंपास केला. या अमानुष प्रकारामुळे परिसरात तीव्र संताप व्यक्त होत आहे. ‘शेतकऱ्यांच्या घरावर दरोडे पडत असतील तर सर्वसामान्यांनी सुरक्षित राहायचे कसे, असा संतप्त सवाल नागरिक उपस्थित करत आहेत. गुन्हेगारांचा वाढता बिनधास्तपणा पाहता कायद्याचा धाक उरला आहे का, असा प्रश्नही उपस्थित होत आहे. घटनेची माहिती मिळताच म्हसवड पोलीस ठाण्याचे सहाय्यक पोलीस निरीक्षक संदीप पोमण, पोलिस शिपाई अनिल वाघमोडे व जगन्नाथ लुबाळ यांनी घटनास्थळी धाव घेत तपास सुरू केला आहे. या दरोडेखोरांना तात्काळ अटक करून कठोर कारवाई करावी, अशी मागणी ग्रामस्थांकडून होत आहे.
