Chandgude Family Case : बीड बायपास परिसरातील एकदंत नगर येथील चांदगुडे कुटुंबाच्या खवड्या डोंगरावरील प्रकरणाला आता वेगळे वळण मिळाले आहे. कुणाल चांदगुडे याला तो टोकाचा निर्णय घ्यायचाच नव्हता. तर आई-वडिलांमध्ये सुरू असलेल्या सततच्या वादाला कंटाळून त्यांना घाबरवण्यासाठी तो खवड्या डोंगरावर गेला होता, अशी माहिती नातेवाईकांच्या सूत्रांनी दिली आहे. मात्र, कुणालला वाचवण्याच्या प्रयत्नात त्याच्या आई-वडिलांचा दुर्दैवी मृत्यू झाला.

नातेवाईकांच्या माहितीनुसार, कुणालच्या आई-वडिलांमध्ये गेल्या काही दिवसांपासून सातत्याने वाद होत होते. घरातील या वातावरणामुळे कुणाल मानसिक तणावात होता. आई-वडिलांचे भांडण थांबावे आणि त्यांनी आपल्याला गांभीर्याने घ्यावे, या उद्देशाने त्याने डोंगरावर जाऊन आत्महत्या करण्याचा बनाव केल्याचे सांगितले जात आहे.

सुरुवातीला या घटनेमागे आयफोनच्या ईएमआयचा मुद्दा असल्याची चर्चा होती. मात्र, कुणाल आणि त्याच्या आईकडे आधीपासूनच आयफोन असल्याने या घटनेचा फोनच्या हप्त्यांशी थेट संबंध नसल्याचे नातेवाईकांनी स्पष्ट केले आहे.

वाचवण्यासाठी गेले अन् काळाचा घाला –

कुणाल खवड्या डोंगरावर गेल्यानंतर त्याला वाचवण्यासाठी त्याचे आई-वडीलही तातडीने तेथे पोहोचले. कुणालला वाचवण्याच्या प्रयत्नात पाय घसरल्याने दोघेही डोंगरावरून खाली पडले. या दुर्घटनेत त्यांचा जागीच मृत्यू झाला.

घरी पोलिसांकडून पंचनामा –

घटनेनंतर पोलिसांनी एकदंत नगर येथील चांदगुडे यांच्या घरी जाऊन पंचनामा केला. तसेच या घटनेमागील नेमके कारण आणि घरातील परिस्थिती जाणून घेण्यासाठी पोलिसांकडून अधिक चौकशी सुरू आहे.

कुणालचे वडील चालक होते, तर त्याची आई युट्यूबर होती. कुणाल अभ्यासात हुशार असल्याचे नातेवाईक सांगतात. कामानिमित्त वडील अनेकदा बाहेर असल्याने तो बहुतांश वेळ आईसोबत राहत होता. त्यामुळे घरातील वादाचा त्याच्यावर परिणाम होत असल्याचेही सांगितले जात आहे.

घरातील कुत्राही कुणालच्या प्रतीक्षेत –

दरम्यान, कुणालने जिव्हाळ्याने पाळलेला कुत्रा घरात एकटाच आहे. घरात कोणीही नसल्याने तो सतत भुंकत असून कुणाल आणि त्याच्या आईची वाट पाहत असल्याचे हृदयद्रावक चित्र परिसरात पाहायला मिळत आहे. या घटनेमुळे एकदंत नगर परिसरात हळहळ व्यक्त होत आहे.

या प्रकरणातील नेमके सत्य आणि कुणाल डोंगरावर कोणत्या उद्देशाने गेला होता, याचा तपास पोलीस करत आहेत.