kriti sanon : बॉलिवूड अभिनेत्री क्रिती सेनॉन आणि अभिनेता विकी कौशल हे दोघेही नुकतेच ‘Too Much with Kajol and Twinkle’ या टॉक शोमध्ये सहभागी झाले. या शोमध्ये त्यांनी त्यांच्या कारकिर्दीशी निगडित अनेक गमतीदार आठवणी आणि अनुभव शेअर केले. मात्र सर्वांचे लक्ष वेधून घेतले ते त्यांनी सांगितलेल्या हृतिक रोशनबद्दलच्या किस्स्यांनी. “हृतिक रोशनने मला रात्री २ वाजता फोन केला होता” – क्रिती सेनॉन क्रितीने आपल्या सुरुवातीच्या दिवसांचा एक मजेशीर प्रसंग सांगितला. ती म्हणाली, “माझ्या रूममध्ये एकाच व्यक्तीचं पोस्टर होतं ते म्हणजे हृतिक रोशन. ‘हिरोपंती’ रिलीज झाल्यानंतर एका रात्री दोन वाजता माझा फोन वाजला. नंबर अनोळखी होता, म्हणून मी ट्रूकॉलरवर पाहिलं… आणि समजलं की तो हृतिक रोशनचा नंबर आहे! त्या क्षणी मला विश्वासच बसला नाही. मी इतकी थक्क झाले की त्याच्याशी बोलायचं धाडसच झालं नाही. मी सकाळपर्यंत थांबले आणि मग त्याला परत फोन केला.” तिने पुढे सांगितलं की, टायगर श्रॉफने ‘हिरोपंती’च खास स्क्रीनिंग हृतिकसाठी ठेवलं होतं आणि हृतिकला तिचं काम आवडलं म्हणून त्याने तिला स्वतः कॉल केला. हा किस्सा ऐकून प्रेक्षकही भारावून गेले. “मी तीन दिवस सराव केला होता हृतिकला भेटण्यासाठी” – विकी कौशल विकी कौशलनेही हृतिकबद्दल आपला अनुभव सांगितला. तो म्हणाला, “मी हृतिकचा खूप मोठा फॅन होतो आणि आजही आहे. ‘कहो ना प्यार है’ आला तेव्हा सगळे त्याच्यासाठी वेडे झाले होते. नंतर मला कळलं की माझे बाबा त्याच्यासोबत काम करत आहेत. मी त्यांना म्हटलं, मला हृतिकला भेटायचं आहे. त्यांनी सांगितलं की हृतिक फक्त त्या मुलांना भेटतो जे ‘एक पल का जीना’ या गाण्यावर डान्स करू शकतात. मग मी तीन दिवस त्या गाण्यावर डान्सचा सराव केला.” विकी पुढे म्हणाला, “शेवटी जेव्हा मी त्याला भेटलो, तेव्हा त्याने खूप प्रेमाने स्वागत केलं आणि माझ्यासोबत फोटोही काढले. तो क्षण मी कधीच विसरू शकत नाही.” दोघांनी सांगितलेल्या या आठवणी सोशल मीडियावर सध्या जोरदार चर्चेत आहेत. चाहत्यांना या किस्स्यांमधून हृतिक रोशनबद्दलचा त्यांचा खरा आदर आणि फॅनगिरीचा उत्साह स्पष्ट दिसून आला.
