कोयनानगर: कोयना धरणातून ५३,३०० क्युसेक विसर्ग सुरु असल्यामुळे कोयना नदीच्या महापूराचा धोका निर्माण झाला आहे. मुसळधार पावसामुळे कोयना–नवजा मार्गावरील पाबळ नाल्याजवळ रस्त्याला मोठे तडे जाऊन वाहतूक ठप्प झाली आहे.

कोयना पाणलोट क्षेत्रात दोन दिवसांपासून मुसळधार पावसाची कोसळधार सुरू आहे. महाबळेश्वरला १५१ मिमी, कोयनाला १९२ मिमी तर नवजा येथे तब्बल ३१८ मिमी पावसाची नोंद झाली आहे. या मुसळधार पावसामुळे धरणातील पाणीपातळी 2158’04’’ फूट (657.860 मी.) इतकी झाली असून एकूण साठा 98.57 TMC म्हणजेच 93.65 टक्के इतका आहे.

धरणात 64,190 क्युसेक (5.54 TMC) एवढा येवा होत असून पाणीपातळी नियंत्रित ठेवण्यासाठी १९ ऑगस्ट रोजी सकाळी ८ वाजता सहा वक्र दरवाजे ६ फूटांवरून ८ फूटांपर्यंत उघडण्यात आले. त्यातून ५१,२०० क्युसेक पाणी नदीत सोडले जात आहे. तसेच पायथा विद्युतगृहातील दोन्ही युनिट्समधून २१०० क्युसेक विसर्ग सुरू आहे.

अशाप्रकारे कोयना नदीत मिळून ५३,३०० क्युसेक विसर्ग सुरू झाला आहे. त्यामुळे नदीकाठच्या गावांना प्रशासनाने सतर्कतेचा इशारा दिला आहे. विसर्गाचा वेग वाढल्याने नदीपात्रातील पाणी झपाट्याने वाढण्याची शक्यता आहे. कोयना परिसरात पावसाचा जोर कायम असून धरणातील वाढता येवा व विसर्गामुळे परिस्थिती गंभीर बनत आहे.