१८ लि.च्या घागरीला १३०० रुपये भाव ; गतवर्षीच्या तुलनेत खरेदी कमी
Kojagiri Purnima:  कोजागरी पौर्णिमेनिमित्त दरवर्षी दूध खरेदीसाठी होणारी लगबग यावर्षी काहीशी कमी झाली आहे. गणेश पेठ दूध बाजार खरेदी-विक्री संघात शनिवारी १८ लि.च्या दुधाच्या घागरीला १३०० रुपये भाव मिळाला.

मागील वर्षी याच काळात घागरीला १४०० रुपये दर मिळाला होता. यावर्षी पौर्णिमा दोन दिवस असल्याने उद्या (रविवार, दि.२५) दूध खरेदी-विक्री होणार असली, तरी मागील वर्षाच्या तुलनेत मागणी कमी असल्याचे दूध व्यावसायिकांनी सांगितले.

कोजागरी पौर्णिमेला मसाला दूध पिण्याची परंपरा असल्याने या दिवशी दुधाला शहर आणि परिसरातून मोठी मागणी असते. सार्वजनिक गणेश मंडळे, गृहनिर्माण सोसायट्या, राजकीय पदाधिकारी आणि मिठाई विक्रेत्यांकडून मोठ्या प्रमाणात दूध खरेदी केले जाते.

पौर्णिमेच्या निमित्ताने विविध ठिकाणी सामूहिक कार्यक्रमांचे आयोजन केले जाते. त्यामुळे दूध विक्रीत वाढ होण्याची अपेक्षा दूध व्यावसायिकांना असते. मात्र, यावर्षी ही मागणी अपेक्षेइतकी नसल्याचे चित्र आहे.

यावर्षी पौर्णिमा रविवार आणि सोमवार असणार आहे. त्यामुळे काही ग्राहकांकडून आज (रविवारी), तर काही ग्राहकांकडून उद्या (सोमवारी) दूध खरेदी केली जाण्याची शक्यता आहे. मात्र, एकाच दिवशी मोठ्या प्रमाणात होणार्‍या खरेदीचे प्रमाण यावर्षी कमी असल्याचे व्यावसायिकांचे म्हणणे आहे.

दरम्यान, नुकत्याच पार पडलेल्या दसरा सणाच्या दिवशी गणेश पेठ दूध बाजारात १८ लि.च्या घागरीला १५०० रुपये दर मिळाला होता. त्या तुलनेत कोजागरी पौर्णिमेला घागरीला मोठा दर मिळेल, अशी अपेक्षा दूध व्यावसायिकांकडून व्यक्त केली जात होती परंतु, तुलनेने मागणी तसेच अपेक्षित दरही कमी असल्याचे व्यावसायिक विष्णू मोरे यांनी सांगितले.

कोजागरी पौर्णिमेनिमित्त पुणे जिल्ह्याच्या विविध भागांतून दूध बाजारात शनिवारी दुधाची मोठी आवक झाली. परंतु, तुलनेने अपेक्षित दर मात्र कमीच आहे. मागणी वाढल्यास दर काहीसा वाढू शकेल.
– दामोदर हिंगमिरे, उपाध्यक्ष, गणेश पेठ दूध बाजार खरेदी-विक्री संघ