Khopoli Leopard News – खोपोलीतील गारमाळ परिसरात बिबट्याचा वावर आढळून आल्याने नागरिकांमध्ये चिंतेचे वातावरण निर्माण झाले आहे. गारमाळ रस्त्यावर बिबट्या दिसल्याच्या घटनेमुळे या भागात वन्यजीवांची उपस्थिती अधोरेखित झाली असून वन विभागाने नागरिकांना सतर्क राहण्याचे आवाहन केले आहे. खालापूर तालुका वनाधिकारी राजेंद्र पवार यांच्या मार्गदर्शनाखाली वनपाल भगवान दळवी, हेल्प फाउंडेशनचे गुरुनाथ साठेलकर तसेच वनकर्मचारी घुटे, नागरगोजे, काटकर आणि प्राणीमित्रांच्या सहकार्याने सोमवारी (दि. २३) गारमाळ परिसरातील जंगल आणि दरी भागात सर्वेक्षण करण्यात आले. या पाहणीदरम्यान वन्य प्राण्यांसाठी असलेल्या नैसर्गिक पाणवठ्यांची स्वच्छता करून त्यातील गाळ काढण्यात आला. सर्वेक्षणात तीन ठिकाणी बिबट्याची विष्ठा आढळून आली, तसेच साळींदर व इतर प्राण्यांचे पायांचे ठसेही दिसून आले. यामुळे या परिसरात बिबट्यासह अन्य वन्य प्राण्यांचा सक्रिय वावर असल्याचे स्पष्ट झाले आहे. दरम्यान, अहिल फेन्स अँड गॅबियनचे डायरेक्टर अशपाक लोगडे, हेल्प फाउंडेशनचे अमोल कदम, अमोल ठकेकर, दिनेश ओसवाल, निलेश कुदळे, महेश भोसले, भक्ती साठेलकर, शंतनु खरे आदी सदस्यांनी वन विभागासोबत गस्त घालण्याची तयारी दर्शवली आहे. वन विभागाने परिसरात बिबट्याचा वावर आहे, काळजी घ्या असे फलक लावले असून नागरिकांनी विशेषतः सकाळ-संध्याकाळच्या वेळी सतर्क राहावे, एकट्याने जंगलात जाणे टाळावे, लहान मुलांना एकटे बाहेर पाठवू नये तसेच संशयास्पद हालचाल दिसल्यास तात्काळ वन विभाग किंवा स्थानिक प्रशासनाला माहिती द्यावी, असे आवाहन करण्यात आले आहे. वन विभागाच्या उपाययोजनांबरोबरच नागरिकांच्या सहकार्यामुळे संभाव्य धोका टाळता येईल, असेही यावेळी नमूद करण्यात आले.
