प्रभात वृत्तसेवा वाघोली – महापालिका निवडणुकांच्या पार्श्वभूमीवर जाहीर झालेल्या प्रभागनिहाय प्रारूप मतदार यादीत वाघोली परिसरातील मतदारांनी आपल्या नावांची खात्री करून घेण्याचे आवाहन निवडणूक विभागाकडून करण्यात आले आहे.नवीन प्रभागनिहाय प्रारूप मतदार यादी गुरुवारी (दि. 20) जाहीर झाली असून नागरिकांनी आपले नाव आपण वास्तव्यास असलेल्या प्रभागात आहे का, याची खात्री करणे अपरिहार्य ठरणार आहे. मूळ प्रभागाच्या यादीनुसार नाव नसल्यास मतदारांनी संबंधित कालावधीत हरकती व सूचना दाखल करणे आवश्यक आहे. पुणे महापालिकेच्या 41 प्रभागांसाठी प्रकाशित करण्यात आलेल्या प्रारूप यादीनुसार शहरात एकूण 35 लाख 51 हजार 469 मतदार आहेत. त्यापैकी 3 लाखांहून अधिक मतदारांचे नावे दुबार असल्याचे तपासात निष्पन्न झाले आहे. प्रभाग क्रमांक तीन व चार मधील मतदारसंख्या लाखाच्या पुढे गेल्याने मतदार पडताळणी अधिक महत्त्वाची ठरत आहे.महापालिका आयुक्त नवल किशोर राम म्हणाले, राज्य निवडणूक आयोगाच्या आदेशानुसार पुणे महापालिका निवडणुका लवकरच होणार आहेत. त्यासाठी प्रभाग रचना व आरक्षण आधीच जाहीर करण्यात आले आहे. दुबार नावे असलेल्या मतदारांची छाननी करून ती यादीतून वगळण्याची प्रक्रिया आयोगामार्फत पूर्ण केली जाईल. निवडणूक आयोगाच्या निर्देशानुसार 20 नोव्हेंबर ते 27 नोव्हेंबर 2025 या कालावधीत मतदार याद्यांबाबत हरकती अथवा सूचना दाखल करता येणार आहेत. यासाठी पुणे महापालिका मुख्य इमारत निवडणूक विभाग तसेच सर्व क्षेत्रीय कार्यालयांमध्ये सुविधा उपलब्ध करून देण्यात आल्या आहेत.मतदारांनी प्रारूप याद्यांमध्ये आपले नाव, पत्ता व प्रभाग योग्य नोंदला आहे की नाही, याची खात्री करून घ्यावी. चुकीच्या नोंदीबाबत सूचना अथवा हरकती निर्धारित कालावधीत दाखल न केल्यास अंतिम यादीत नाव राहण्यास अडचण येऊ शकते. मतदारसंख्या वाढून 73 हजारांवर वाघोलीतील मतदारांची संख्या लोकसभा मतदार यादीत सुमारे 60 हजार 700 होती, तर विधानसभेसाठी तब्बल 68 हजार मतदार नोंदले होते. मात्र, महापालिका निवडणुकीसाठी वाघोलीतील मतदारसंख्या वाढून 73 हजारांवर पोचली आहे. वाघोलीचा समावेश प्रभाग क्रमांक तीन व चारमध्ये करण्यात आला असून जुन्या मतदार यादीनुसार काही मतदारांची नावे त्यांच्या वास्तव्याच्या मूळ प्रभागात न राहता इतर प्रभागात आढळत आहेत.
