Khataw Accident – खटाव तालुक्यातील मायणी गावच्या हद्दीत बहुजन समाज पक्षाचे तालुकाध्यक्ष गणेश अशोक थोरात (रा.धोंडेवाडी) यांचा अपघाती मृत्यू झाला. गणेश थोरात हे हिरो होंडा शाईन गाडीवरून वडील अशोक थोरात यांना घेऊन धोंडेवाडी गावाकडे घेऊन येत होते. कातरखटाव रस्त्यावरील काबुगडे वस्ती येथे समोरून भरधाव वेगाने येणाऱ्या इर्टिगा चारचाकी गाडीने त्यांना जोराची धडक दिली. या अपघातात ते दोघे गंभीर जखमी झाले. दोघांना बंधू मंगेश व इतरांनी मायणी येथील खासगी रुग्णालयात उपचारासाठी नेण्यात आले. मात्र तेथील डॉक्टरांनी गणेश मृत झाल्याचे सांगितले. तर वडील अशोक थोरात हे गंभीर जखमी असल्याने त्यांना पुढील उपचारासाठी कराड येथील रुग्णालयात दाखल केले आहे. हलगर्जीपणे वाहन चालवून मृत्यूस कारणीभूत ठरल्याप्रकरणी इर्टिगा चालका विरोधात गुन्हा दाखल करण्यात आला आहे. गणेश थोरात यांच्या पश्चात पत्नी व लहान मुलगी असा परिवार आहे. वडूज येथे नाश्तासेंटर चालवून कुटुंबाचा उदरनिर्वाह चालवत असताना ते बहुजन समाज पक्षाच्या माध्यमातून सर्वसामान्य जनतेची सेवा करणाऱ्या कार्यकर्त्याचा अशा प्रकारे दुर्दैवी मृत्यू झाल्याबद्दल परिसरात तीव्र हळहळ व्यक्त होत आहे.
