ढाका : बांगलादेशच्या माजी पंतप्रधान खालिदा झिया यांची प्रकृती अत्यंत चिंताजनक असल्याचे त्यांच्यावर उपचार करत असलेल्या डॉक्टरांनी म्हटले आहे. झिया यांना २३ नोव्हेंबरला ढाकातल्या एव्हरकेअर रुग्णालयात दाखल करण्यात आले असून अनेक व्याधींनी त्या ग्रस्त आहेत. दिनांक ११ डिसेंबर रोजी त्यांच्या फुफ्फुसांना आणि इतर महत्त्वाच्या अवयवांना विश्रांती देण्यासाठी त्यांना व्हेंटिलेटर सपोर्टवर ठेवण्यात आले. तेंव्हापासून त्या व्हेंटिलेटरवरच आहेत. आता त्यांची प्रकृती सुधारत आहे, असे म्हणता येऊ शकत नाही. त्यांची प्रकृती अतिशय चिंताजनक असल्याचे डॉ. एझेडएम झाहिद यांनी शनिवारी मध्यरात्रीनंतर माध्यमांशी बोलताना सांगितले. झिया यांच्या प्रकृतीत सुधारणा व्हावी, यासाठी प्रार्थना करावी, असे आवाहनही त्यांनी देशवासियांना केली आहे. खालिदा झिया यांचे पुत्र आणि बीएनपीचे कार्यवाहक अध्यक्ष तारिक रहमान मध्यरात्रीच्या सुमारास दोन तास रुग्णालयात थांबले होते. स्थानिक आणि परदेशी डॉक्टर झिया यांच्यावर उपचार करत आहेत. झिया यांच्या सून डॉ. झुबैदा रहमान देखील उपचार प्रक्रियेत सक्रियपणे सहभागी आहेत. झिया यांना प्रगत वैद्यकीय उपचारांसाठी परदेशात नेण्याचा विचार केला जात होता. मात्र डॉक्टरांनी झिया यांना विमान प्रवास न करू देण्याची सूचना केल्याने तो पर्याय रद्द करण्यात आला.
