Kesnand Phata Accident – केसनंद फाटा चौकात घडलेल्या अपघातानंतर पळून जाणार्या ट्रकचालकाचा इको कार चालकाने पाठलाग करत धाडस दाखविले; मात्र ट्रकचालकाने इको कारला धडक देत काही अंतर फरफटत नेल्याने चित्तथरारक घटना घडली. अखेर पोलिसांनी ट्रकचालकाला ताब्यात घेत गुन्हा दाखल केला आहे. ही घटना शनिवारी (दि.28) पहाटे सव्वा चारच्या सुमारास घडली. याप्रकरणी ट्रकचालक तारिक इसब (वय 25, रा. मेवात, हरियाणा) याच्यावर गुन्हा दाखल करण्यात आला असून इको कार चालक भरत सातव यांनी फिर्याद दिली आहे. भरत सातव हे वाघोलीतील विठ्ठलवाडी परिसरात राहतात. ते केसनंद फाटा येथे चहा पिण्यासाठी थांबले असताना पुण्याहून नगरकडे जाणार्या भरधाव मालवाहू ट्रकने अचानक वळण घेत ब्रेक मारला. यामुळे मागून येणार्या टेम्पोची ट्रकला धडक बसली. या अपघातात टेम्पोची पुढील बाजू दाबली जाऊन चालक अडकून जखमी झाला. अपघातानंतर ट्रकचालक न थांबता केसनंदच्या दिशेने पळून जाऊ लागला. यावेळी भरत सातव यांनी इको कारने त्याचा पाठलाग केला. जोगेश्वरी हायस्कूलसमोर ट्रक थांबवण्याचा प्रयत्न करत असताना ट्रकचालकाने कारला जोराची धडक देत काही अंतर फरफटत नेले. कार आडवी आल्याने ट्रक पुढे जाऊ शकला नाही. दरम्यान, पाठलाग करणारी पोलिसांची गाडीही घटनास्थळी पोहोचली आणि ट्रकचालकाला ताब्यात घेतले. या घटनेत इको कारचे मोठे नुकसान झाले असून चालक भरत सातव यांना दुखापत झाली नाही. दरम्यान, अपघातातील टेम्पोची पुढील बाजू दबली गेल्याने चालक गोविंद मंडलिक (रा. पाटोदा, जि. बीड) यांना पोलिस व नागरिकांच्या मदतीने बाहेर काढून रुग्णालयात दाखल करण्यात आले. त्यांचा पाय फ्रॅक्चर झाला आहे. भरत सातव यांच्या फिर्यादीनुसार ट्रकचालकावर वाघोली पोलीस ठाण्यात गुन्हा दाखल करण्यात आला असून पुढील तपास सुरू आहे.
