Archana Puran Singh Birthday: बॉलिवूडमध्ये आपल्या खळखळून हसण्याने आणि विनोदी अंदाजाने प्रेक्षकांची मनं जिंकणाऱ्या अभिनेत्री अर्चना पूरण सिंह यांचा आज, २६ सप्टेंबर रोजी वाढदिवस आहे. अर्चना यांनी आपल्या अभिनयाच्या जोरावर मनोरंजन विश्वात वेगळी ओळख निर्माण केली आहे. मात्र, त्यांच्या व्यावसायिक आयुष्याइतकीच त्यांच्या वैयक्तिक आयुष्याचीही चर्चा होत असते. अर्चना आणि त्यांचे पती परमीत सेठी यांची प्रेमकहाणी एखाद्या चित्रपटाच्या कथेला साजेशी आहे. पहिली भेट, मैत्री, प्रेम आणि त्यानंतर कुटुंबीयांपासून लपवून केलेलं लग्न, असा त्यांचा प्रवास राहिला आहे.

पहिली भेट झाली अन् प्रेमाची सुरुवात झाली

अर्चना पूरण सिंह आणि परमीत सेठी यांची पहिली भेट १९८८ मध्ये एका सामायिक मित्राच्या माध्यमातून झाली होती. त्या काळात दोघेही आपल्या जुन्या नात्यांमधून बाहेर पडत होते. त्यामुळे सुरुवातीला दोघांनाही नवीन नात्यात लगेच गुंतायचं नव्हतं. पहिल्या भेटीत त्यांच्यात फारसं काही गंभीर नव्हतं. दोघांनीही या नात्याकडे सहजपणे पाहण्याचा निर्णय घेतला होता. एकमेकांकडून कोणत्याही मोठ्या अपेक्षा ठेवायच्या नाहीत, असं त्यांनी ठरवलं होतं.

मात्र, काळ जसजसा पुढे गेला, तसतशा त्यांच्या भेटीगाठी वाढू लागल्या. एकमेकांशी बोलताना दोघांनाही छान वाटू लागलं. सुरुवातीला सहज सुरू झालेली मैत्री हळूहळू प्रेमात बदलली. दोघांनाही एकमेकांची सवय झाली आणि त्यांच्यातील नातं अधिक घट्ट होत गेलं.

परमीत यांनी घेतला लग्नाचा निर्णय

अर्चना आणि परमीत यांचं नातं अधिक घट्ट झाल्यानंतर परमीत यांना अर्चना याच आपल्यासाठी योग्य जोडीदार असल्याची जाणीव झाली. दोघांनीही एकमेकांसोबत आयुष्य घालवण्याचा निर्णय घेतला. मात्र, त्यांच्या लग्नाचा मार्ग तितका सोपा नव्हता. परमीत यांच्या कुटुंबीयांना या नात्याबद्दल पूर्णपणे मान्यता नव्हती. त्यामुळे दोघांसमोर मोठा प्रश्न निर्माण झाला होता.

अशा परिस्थितीत अर्चना आणि परमीत यांनी एकमेकांची साथ सोडली नाही. कुटुंबीयांची संमती मिळण्याची वाट पाहण्याऐवजी त्यांनी लग्न करण्याचा निर्णय घेतला. विशेष म्हणजे, दोघांनी एका रात्री अचानक लग्न करण्याचं ठरवलं. त्यानंतर त्यांनी लग्नासाठी पंडितजींचा शोध घेतला. दुसऱ्या दिवशी सकाळी दोघेही विवाहबंधनात अडकले. अशा प्रकारे कोणताही मोठा गाजावाजा न करता त्यांनी आपल्या नव्या आयुष्याची सुरुवात केली.

तब्बल चार वर्षं लपवलं लग्न

अर्चना आणि परमीत यांनी लग्न केल्यानंतरही ही गोष्ट अनेक वर्षं सार्वजनिक केली नव्हती. जवळपास चार वर्षं त्यांनी आपल्या लग्नाची बातमी सर्वांपासून लपवून ठेवली होती. यामागे एक महत्त्वाचं कारण होतं. त्या काळात चित्रपटसृष्टीमध्ये लग्न झाल्यानंतर अभिनेत्रींच्या करिअरवर परिणाम होतो, अशी धारणा होती. लग्न झाल्यानंतर अभिनेत्रींच्या हातात कमी काम येतं, असं मानलं जात होतं. अर्चना यांना आपल्या अभिनयाच्या करिअरवर कोणताही परिणाम होऊ द्यायचा नव्हता. त्यामुळे त्यांनी लग्नाची गोष्ट गुप्त ठेवण्याचा निर्णय घेतला. विशेष म्हणजे, लग्नाआधीपासूनच दोघे एकत्र राहत असल्यामुळे त्यांच्या आसपासच्या लोकांनाही त्यांच्या लग्नाचा संशय आला नाही. योग्य वेळ येईपर्यंत त्यांनी आपलं नातं खासगी ठेवलं.

तीन दशकांहून अधिक काळ टिकलेलं नातं

अर्चना पूरण सिंह आणि परमीत सेठी यांच्या लग्नाला तीन दशकांहून अधिक काळ झाला आहे. या काळात दोघांनी आपल्या नात्यातील प्रेम आणि विश्वास टिकवून ठेवला आहे. त्यांना दोन मुलं असून ते आपल्या कुटुंबासोबत आनंदी आयुष्य जगत आहेत.

आजही अर्चना आणि परमीत सोशल मीडियावरून आपल्या आयुष्यातील अनेक मजेशीर किस्से चाहत्यांसोबत शेअर करतात. त्यांच्या यूट्यूब चॅनेलवरही दोघांच्या वैयक्तिक आयुष्याची झलक पाहायला मिळते. सुरुवातीला सहज सुरू झालेलं नातं आज इतक्या वर्षांनंतरही टिकून आहे. प्रेम, विश्वास आणि एकमेकांना दिलेली साथ यामुळे अर्चना आणि परमीत यांची जोडी चाहत्यांमध्ये चर्चेचा विषय ठरते. त्यांच्या प्रेमकहाणीतील सर्वात खास गोष्ट म्हणजे, चार वर्षं जगापासून लपवलेलं नातं आजही तितक्याच आपुलकीने जपलं जात आहे.