KDMC Elections : कल्याण-डोंबिवली महानगरपालिका (केडीएमसी) निवडणुकीसाठी उमेदवारी अर्ज भरण्याच्या शेवटच्या दिवशी राजकीय घडामोडींना वेग आला आहे. अर्ज भरण्याची मुदत संपताच भारतीय जनता पक्षाने आपले खाते उघडले असून, निवडणुकीच्या रिंगणात उतरण्यापूर्वीच भाजपचा पहिला विजय निश्चित मानला जात आहे. प्रभाग क्रमांक १८ अ मधील ओबीसी महिला राखीव जागेसाठी भाजपच्या उमेदवार रेखा चौधरी यांचा एकमेव अर्ज दाखल झाला आहे. या प्रभागात अन्य कोणत्याही पक्षाने किंवा अपक्ष उमेदवाराने अर्ज न भरल्यामुळे चौधरी यांचा बिनविरोध निवडून येण्याचा मार्ग मोकळा झाला आहे. ३१ डिसेंबर रोजी अर्जांची छाननी होणार असून, तांत्रिक पडताळणीनंतर त्यांच्या विजयाची अधिकृत घोषणा निवडणूक आयोगाकडून केली जाईल. यावेळची निवडणूक अत्यंत चुरशीची ठरणार असून महायुतीसमोर उद्धव ठाकरेंची शिवसेना (७३ जागा) आणि राज ठाकरेंच्या मनसेचे (४९ जागा) मोठे आव्हान आहे. बंडखोरी टाळण्यासाठी शिवसेना-भाजपने शेवटच्या क्षणापर्यंत उमेदवारांची यादी जाहीर न करता थेट ‘एबी फॉर्म’ देण्याचे धोरण अवलंबले होते. तरीही काही जागांवर बंडखोरांनी अर्ज भरल्याने महायुतीसमोर त्यांना शांत करण्याचे आव्हान कायम आहे. १२२ जागांसाठी येत्या १५ जानेवारीला मतदान होणार असून १६ जानेवारीला निकाल जाहीर होतील. भाजपच्या या सुरुवातीच्या यशामुळे कार्यकर्त्यांमध्ये उत्साहाचे वातावरण आहे.
