Shivsena Ubt : कल्याण-डोंबिवली महापालिकेच्या राजकारणात मोठी घडामोड घडली असून शिवसेना (उद्धव बाळासाहेब ठाकरे) पक्षाने नगरसेवक मधुर म्हात्रे यांची पक्षातून हकालपट्टी केली आहे. पक्षाच्या आदेशांचे वारंवार उल्लंघन केल्यामुळे ही कारवाई करण्यात आल्याची माहिती पक्षाकडून देण्यात आली. मिळालेल्या माहितीनुसार, केडीएमसी निवडणुकीत शिवसेना (उद्धव बाळासाहेब ठाकरे) पक्षाचे एकूण ११ नगरसेवक निवडून आले होते. त्यामध्ये मधुर म्हात्रे यांचाही समावेश होता. मात्र निवडून आल्यानंतर ते शिवसेनेच्या शिंदे गटाच्या संपर्कात असल्याची चर्चा सुरू झाली होती. या पार्श्वभूमीवर पक्षाकडून त्यांना अनेक वेळा कारणे दाखवा नोटीस बजावण्यात आली होती. तसेच पक्षाच्या बैठकीला उपस्थित राहण्याचे निर्देशही देण्यात आले होते. मात्र नोटीस मिळूनही त्यांनी पक्षाच्या कोणत्याही बैठकीला हजेरी लावली नाही. याशिवाय महापालिकेच्या महासभेच्या दिवशीही पक्षाने दिलेल्या आदेशांचे उल्लंघन केल्याचा आरोप करण्यात आला आहे. त्यामुळे अखेर पक्षाने शिस्तभंगाची कारवाई करत मधुर म्हात्रे यांची पक्षातून हकालपट्टी करण्याचा निर्णय घेतला. या निर्णयानंतर केडीएमसीमध्ये शिवसेना (उद्धव बाळासाहेब ठाकरे) गटाचे नगरसेवकांची संख्या आता १० वर आली आहे. पक्षशिस्त पाळण्याबाबत इतर पदाधिकाऱ्यांना आणि सदस्यांना स्पष्ट संदेश देण्यासाठी ही कारवाई करण्यात आल्याचे पक्षाच्या पदाधिकाऱ्यांनी सांगितले.
