Kashmir : काश्मीर गारठले…! गुलमर्ग-पहलगाममध्ये पारा शून्याखाली
शोपियानमध्ये उणे ३.४ अंशांची नोंद : श्रीनगरमध्ये मोसमातील सर्वांत थंड रात्र

Kashmir : निसर्गसौंदर्याने नटलेले काश्मीर खोरे आता थंडीच्या कडाक्यात गारठू लागले आहे. गुलमर्ग आणि पहलगामसारख्या लोकप्रिय पर्यटनस्थळांवर तापमानाचा पारा शून्याखाली घसरला असून, शोपियानमध्ये तर उणे ३.४ अंश सेल्सिअस तापमानाची नोंद झाली आहे. वाढत्या थंडीमुळे संपूर्ण खोऱ्यात हुडहुडी भरली आहे.
काश्मीरमधील अनेक भागांत रात्रीच्या तापमानात मोठी घट झाली आहे. विशेष म्हणजे, श्रीनगरमध्ये या हंगामातील आतापर्यंतची सर्वांत थंड रात्र नोंदवण्यात आली. येथे किमान तापमान उणे ०.२ अंश सेल्सिअसपर्यंत खाली आले. हे तापमान सरासरीपेक्षा ०.९ अंशांनी कमी आहे.पर्यटकांचे आकर्षण असलेल्या पहलगाममध्ये पारा उणे २.८ अंशांवर, तर प्रसिद्ध स्की रिसॉर्ट गुलमर्गमध्ये उणे १ अंश सेल्सिअसवर पोहोचला आहे.
उत्तर काश्मीरमधील कुपवाडा येथे उणे १.३ अंश, तर काझीगुंडमध्ये उणे ०.८ अंश तापमानाची नोंद झाली. कोकरनाग येथे मात्र किमान तापमान १ अंश सेल्सिअस राहिले.
दरम्यान, हवामान विभागाने दिलेल्या अंदाजानुसार, नोव्हेंबर महिन्याच्या अखेरपर्यंत काश्मीर खोऱ्यात हवामान प्रामुख्याने कोरडे राहण्याची शक्यता आहे. मात्र, थंडीपासून लवकर दिलासा मिळण्याची चिन्हे नाहीत.
आगामी काही दिवसांत रात्रीच्या तापमानात आणखी घट होऊ शकते. त्यामुळे काश्मीरच्या पर्यटनस्थळांवर येणाऱ्या पर्यटकांना उबदार कपड्यांसह प्रवासाचे नियोजन करावे लागणार आहे. निसर्गरम्य काश्मीर आता हळूहळू कडाक्याच्या हिवाळ्याच्या दिशेने वाटचाल करत आहे.
हेही वाचा:




