नवी दिल्ली – सीबीआयने बुधवारी लोकसभा खासदार कार्ती चिदंबरम यांचे निकटवर्तीय एस भास्करारमण यांना तलवंडी साबो पॉवर लिमिटेडमध्ये काम करणाऱ्या 263 चिनी नागरिकांचे व्हिसा मंजूर करण्यासाठी 50 लाख रुपयांच्या कथित लाच प्रकरणात अटक केली आहे.

2011 मध्ये कार्ती चिदंबरम यांचे वडील पी चिदंबरम केंद्रीय गृहमंत्री असताना ही लाचखोरीची घटना घडली होती असा तपास अधिकाऱ्यांचा आरोप आहे. सीबीआयने मंगळवारी रात्री उशिरा भास्करारमण यांना चौकशीसाठी नेले आणि बुधवारी पहाटे त्यांना अटक करण्यात आली.

तळवंडी साबो पॉवर लिमिटेड (टीएसपीएल) चे तत्कालीन सहयोगी उपाध्यक्ष विकास मखरिया यांनी भास्करारमण यांच्याशी चिनी कामगारांच्या व्हिसा प्रकरणात संपर्क साधला होता, या प्लांटमध्ये काम करणाऱ्या 263 चिनी कामगारांसाठी प्रकल्प व्हिसा पुन्हा जारी करण्यासाठी त्यांनी त्यांच्याकडे प्रयत्न केले होते. भास्कररमण यांनी कार्ती चिदंबरम यांच्यामार्फत या चिनी कामगारांना लाच घेऊन मागच्या दाराने व्हिसा मंजूर केल्याचे सांगण्यात येते.