बंगळुरू  –कर्नाटक जिंकण्याच्या बढाया कॉंग्रेस मारत आहे. मात्र, त्या पक्षाचा यावेळी आणखी नामुष्कीजनक पराभव होईल, असा दावा कर्नाटकचे मुख्यमंत्री आणि भाजपचे नेते बसवराज बोम्मई यांनी शुक्रवारी केला. विधानसभा निवडणुकीमुळे कर्नाटकमधील राजकीय वातावरण तापले आहे. राजकीय पक्षांनी एकमेकांवर आरोप-प्रत्यारोपांच्या फैरी झाडण्याचे सत्र सुरू केले आहे.

त्याशिवाय, दावे-प्रतिदावेही केले जात आहेत. कॉंग्रेसच्या नेत्यांकडून चांगल्या कामगिरीचा विश्‍वास व्यक्त केला जात आहे. त्यावरून शिवमोग्गामध्ये पत्रकारांशी बोलताना बोम्मई यांनी कॉंग्रेसला डिवचले. राज्यातील विधानसभेच्या 224 पैकी सुमारे 60 जागा लढवण्यासाठी कॉंग्रेसकडे योग्य उमेदवार नाहीत. त्यामुळे तो पक्ष इकडून-तिकडून उमेदवार मिळवण्याचा प्रयत्न करत आहे.

कॉंग्रेसचे प्रदेशाध्यक्ष डी.के.शिवकुमार यांनी आमच्या अनेक आमदारांना फोन केले. तुमच्यासाठी जागा राखीव आहेत. आमच्या पक्षात या, अशी विनवणी भाजपच्या आमदारांना करण्यात आली. कॉंग्रेसकडे उमेदवार नाहीत. त्याशिवाय, त्या पक्षाकडे धोरणांबाबत स्पष्टताही नाही, असे ते म्हणाले. कॉंग्रेसने गुरूवारी उमेदवारांची दुसरी यादी जाहीर केली. त्यामध्ये भाजप आणि जेडीएसमधून आलेल्या काही नेत्यांना स्थान देण्यात आले. त्याचा संदर्भ घेऊन बोम्मई यांनी कॉंग्रेसवर निशाणा साधला.