नाशिक : सन २०२७ मध्ये होणाऱ्या सिंहस्थ मेळ्यासाठी राज्य सरकारने स्वतंत्र सिंहस्थ प्राधिकरण स्थापन केले आहे. प्राधिकरणाचा शासकीय कारभार चालविण्यासाठी पहिल्या टप्प्यात महापालिकेच्या अतिरिक्त आयुक्त करिश्मा नायर यांची कुंभमेळा आयुक्तपदावर नियुक्ती करण्यात आली. महापालिकेचे कामकाज सांभाळून नायर यांच्याकडे कुंभमेळा आयुक्तपदाचा अतिरिक्त पदभार असेल. त्यांच्या नियुक्तीमुळे प्राधिकरणासाठी मनुष्यबळ उपलब्ध होणार असून, सिंहस्थाच्या कामाला वेग येणार आहे.

सिंहस्थ कुंभमेळ्याची तयारी प्रशासकीय पातळीवर सुरू असून, सध्या बैठकांचा जोर सुरू आहे. सिंहस्थ विकासकामांसाठी महापालिकेने १५ हजार कोटींचा आराखडा सादर केला आहे. अन्य यंत्रणांनाही नऊ हजार असा तब्बल २४ हजार कोटींपर्यंत नाशिकचा आराखडा शासनाला मंजुरीसाठी सादर करण्यात आला आहे. परंतु, सार्वजनिक बांधकाम विभाग वगळता अन्य विभागांना अद्याप निधी मिळालेला नाही. मुख्यमंत्री फडणवीस यांनी स्वतंत्र प्राधिकरण स्थापन करण्याची घोषणा केली होती. अध्यादेश काढून विभागीय आयुक्त डॉ. प्रवीण गेडाम यांच्या अध्यक्षतेखाली २२ सदस्यीय प्राधिकरण स्थापन करण्यात आले.

प्राधिकरणातील सर्व निर्णय घेण्याचे अधिकार अध्यक्ष अर्थात विभागीय आयुक्तांना असेल. जिल्हाधिकारी, विशेष पोलिस महानिरीक्षक हे प्राधिकरणात उपाध्यक्ष असतील. त्यांच्या मदतीसाठी अहिल्यानगर जिल्हाधिकारी, नाशिक महानगर प्रादेशिक विकास प्राधिकरण आयुक्त, (पदसिद्ध सदस्य) नाशिक शहर पोलिस आयुक्त, पोलिस अधीक्षक नाशिक ग्रामीण, नाशिक महापालिका आयुक्त, जिल्हा परिषद मुख्य कार्यकारी अधिकारी, मुख्याधिकारी त्र्यंबकेश्वर नगरपरिषद, नियोजन उपायुक्त, महाराष्ट्र रस्तेविकास महामंडळ विभागीय नियंत्रक, आरोग्य उपसंचालक, अधीक्षक अभियंता जलसंपदा गोदावरी नदी व जलव्यवस्थापन, बांधकाम विभाग मुख्य अभियंता, मुख्य अभियंता महाराष्ट्र जीवन प्राधिकरण, अधीक्षक अभियंता महावितरण, प्रादेशिक अधिकारी महाराष्ट्र प्रदूषण नियंत्रण महामंडळ, सहसंचालक लेखा व कोषागरे, सहसंचालक नगररचना, रेल्वे मंडळाचा सदस्य आणि कुंभमेळा आयुक्त यांचा समावेश आहे.