Kargil Vijay Diwas । देशात दरवर्षी २६ जुलैला कारगिल विजय दिवस साजरा केला जातो. 1999 च्या कारगिल युद्धात पाकिस्तानला पराभूत करताना हुतात्मा झालेल्या शहीदांच्या स्मरणार्थ हा दिवस साजरा केला जातो. या दिवशी त्यांच्या हौतात्म्याला देश वंदन करतो. याशिवाय हा दिवस 1999 च्या कारगिल युद्धात पाकिस्तानवर देशाचा विजय साजरा करतो आणि ऑपरेशन विजयच्या यशाचे प्रतीक आहे. ऑपरेशन विजयमध्ये, भारतीय सशस्त्र दलाने जम्मू आणि काश्मीरमधील कारगिल जिल्ह्यातील ज्या भागात पाकिस्तानी सैनिक आणि दहशतवाद्यांनी घुसखोरी केली होती त्या भागात पुन्हा ताबा मिळवला. यंदा कारगिल विजय दिवस शुक्रवारी (२६ जुलै) साजरा होत आहे. कारगिल युद्धात भारताच्या विजयाचा हा २५ वा वर्धापन दिन आहे. कारगिल विजय दिवसानिमित्त देशात अनेक ठिकाणी कार्यक्रम आयोजित केले जातात, जिथे लोक वीरांची आठवण ठेवतात. सैनिकांनी केलेले बलिदान व्यर्थ जाणार नाही Kargil Vijay Diwas । चीफ ऑफ डिफेन्स स्टाफ (CDS) जनरल अनिल चौहान यांनी कारगिल विजय दिवसाच्या 25 व्या वर्धापन दिनाच्या पूर्वसंध्येला सांगितले की, 1999 च्या युद्धात सैनिकांनी केलेले बलिदान व्यर्थ जाणार नाही. लष्कराच्या तिन्ही शाखा मोठ्या सुधारणांच्या उंबरठ्यावर आहेत यावर त्यांनी भर दिला. संरक्षण मंत्रालयाने एका निवेदनात म्हटले आहे की, चीफ ऑफ डिफेन्स स्टाफने कारगिल युद्धाच्या 25 वर्षांच्या निमित्ताने सशस्त्र दलातील सर्व जवानांचे अभिनंदन आणि शुभेच्छा दिल्या. हा प्रत्येक भारतीयांसाठी खूप खास दिवस-पंतप्रधान Kargil Vijay Diwas । पंतप्रधान नरेंद्र मोदी शुक्रवारी लडाखमधील कारगिल समर मेमोरिअल येथे 1999 च्या युद्धात पाकिस्तानवर भारताच्या विजयाच्या स्मरणार्थ श्रद्धांजली अर्पण करतील. त्यांनी सोशल मीडिया प्लॅटफॉर्मवर एका पोस्टमध्ये, “26 जुलै हा प्रत्येक भारतीयांसाठी खूप खास दिवस आहे. आम्ही २५ वा कारगिल विजय दिवस साजरा करू. ज्यांनी आपल्या देशाचे रक्षण केले त्यांना श्रद्धांजली अर्पण करण्याचा हा दिवस आहे. मी कारगिल युद्ध स्मारकाला भेट देईन आणि आमच्या शूर वीरांना श्रद्धांजली अर्पण करेन.” असे म्हटले.
