Karad News – तासवडे औद्योगिक वसाहतील श्री फिड इंडस्ट्रीज प्रा. लि. कंपनीने टेक्निकल ग्रेड युरिया म्हणून शेतीसाठी वापरला जाणारा युरिया (निम कोटेड) औद्योगिक कारणासाठी खरेदी करून त्याचा बेकायदेशीर साठा केला आणि त्यापासून पशुखाद्य (कॅटल फीड) तयार केल्याचा गंभीर आरोप करत कृषी विभागाने कंपनीविरुद्ध गुन्हा दाखल केला आहे. याप्रकरणी तळबीड पोलिस ठाण्यात गुन्हा नोंद करण्यात आला आहे. गुन्ह्यात अत्यावश्यक वस्तू कायदा 1955, भारतीय न्याय संहिता 2023 आणि खत नियंत्रण आदेश 1985 अंतर्गत विविध कलमे लावण्यात आली आहेत. तळबीड पोलिसांनी दिलेल्या माहितीनुसार, कंपनीने अज्ञात पुरवठादाराकडून टेक्निकल ग्रेड युरिया म्हणून शेतीसाठी जाणारा निम कोटेड युरिया खरेदी करुन बेकायदेशीररीत्या साठवला. त्याचा वापर करुन पशुखाद्य तयार केले. शासनाची दिशाभूल करून फसवणूक केल्याचा आरोप फिर्यादी अभिजित बाळासाहेब पाटील (वय 40, खते निरीक्षक तथा कृषी अधिकारी (गुण नियंत्रण), तालुका कृषी अधिकारी कार्यालय, कराड) यांनी केला आहे. याप्रकरणी संशयित श्री फिड इंडस्ट्रीज प्रा. लि., (बी- 94, तासवडे एमआयडीसी, कराड) कंपनीचे मालक व सर्व संचालक), व्ही. आर. इंडस्ट्रीयल केमिकल (श्यामनगर सोसायटी, 214, ग्रामपंचायत हाऊस नं. 1122, कांकरा खाडी रोड, बिलिमोरा, गुजरात, मालक) कृषी विभागाकडील परवाना धारक अज्ञात कृषी निविष्ठा विक्री केंद्रधारक यांच्या विरोधात गुन्हा नोंद करण्यात आला आहे. तळबीड पोलीस ठाण्याचे सहाय्यक पोलिस निरीक्षक रवींद्र भोरे तपास करत आहेत. कृषी विभागाच्या या कारवाईमुळे जिल्ह्यात पशुखाद्य उत्पादनातील गुणवत्ता आणि नियंत्रण याबाबत चर्चेला उधाण आले आहे.
