सोलापूर – “काय ते हाटील… काय ते डोंगार अन्‌ काय ती झाडी…’ हे शिंदे गटातील आमदाराचे गुवाहाटीमधील डायलॉग आजही सर्वांच्या लक्षात आहेत. शिवसेनेतील शिंदे गटाच्या बंडानंतर फेमस झालेल्या आसाममधील गुवाहाटीला राज्याच्या राजकारणात सध्या देखील चांगलेच महत्त्व येऊ लागल्याचे दिसून येत आहे. मुख्यमंत्री एकनाथ शिंदे यांच्या पाठोपाठ आता राष्ट्रवादी कॉंग्रेसचे उपमुख्यमंत्री अजित पवारांनाही गुवाहाटीमधील कामाख्या देवी पावल्याचे समोर आले आहे.

अजित पवार हे उपमुख्यमंत्री व्हावेत असा नवस बोललेल्या कल्याणराव काळेंनी नुकताच गुवाहाटीला जाऊन नवस फेडला आहे. एकनाथ शिंदे यांच्या बंडाला एक वर्ष पूर्ण झाल्यानंतर पुन्हा एकदा महाराष्ट्राच्या राजकारणात अजित पवार यांनी भूकंप घडवत राष्ट्रवादी आमदारांसह बंडखोरी केली आणि राज्यात उपमुख्यमंत्री म्हणून सत्तेत सामील झाले.

अजित पवार हे उपमुख्यमंत्री व्हावेत म्हणून त्यांचे कट्टर समर्थक आणि सोलापुरातील सहकार शिरोमणी सहकारी साखर कारखान्याचे अध्यक्ष कल्याणराव काळे यांनी याच कामाख्या देवीला नवस बोलला होता. अजित पवार यांनी शपथ घेतल्यावर काळे यांनी त्यांची भेट घेऊन त्यांना पाठिंबा देत थेट गुवाहाटीकडे प्रस्थान केले.

कल्याणराव काळे यांनी गुवाहाटीतील कामाख्या देवीच्या मंदिरात जाऊन पूजा करत आपला नवस पूर्णही केला. यामुळे पुन्हा एकदा गुवाहाटीला राज्याच्या राजकारणात पुन्हा एकदा मोठं महत्व प्राप्त झाल्याचे स्पष्ट झाले आहे.