Kalachowki News : मुंबईतील काळाचौकी (Kalachowki News) भागात गणपती मंडपात विजेचा धक्का लागून आठ वर्षांच्या मुलीचा मृत्यू आणि इतर काही जण जखमी झाल्याच्या घटनेबाबत, महाराष्ट्र राज्य बालहक्क संरक्षण आयोगाने सोमवारी वरिष्ठ पोलीस अधिकाऱ्यांना नोटीस बजावून सविस्तर अहवाल मागवला आहे.

ही घटना रविवारी पहाटे २.२० च्या सुमारास काळाचौकी येथील दिग्विजय मिल चाळमधील महागणपती उत्सव मंडळाच्या प्रवेशद्वाराजवळ शॉर्ट सर्किट झाल्यामुळे घडली असावी, असे प्राथमिक वृत्त आहे.

नोटीशीनुसार, आयोगाने या घटनेची स्वतःहून दखल घेतली असून, २३ सप्टेंबर रोजी दुपारी १२ वाजता व्हिडिओ कॉन्फरन्सद्वारे (Kalachowki News) सुनावणी निश्चित केली आहे. आयोगाने मुंबई पोलीस आयुक्तांना या घटनेसंदर्भात दाखल करण्यात आलेला एफआयआर, प्राथमिक तपास आणि गणपती मंडळाचे आयोजक किंवा वीज पुरवठादार यांच्यावर केलेली कारवाई यांबाबतचा तपशील सादर करण्याचे निर्देश दिले.

आयोगाने बाल मदत कक्ष, हरवलेल्या मुलांचा शोध घेणारी यंत्रणा, सीसीटीव्ही आणि नियंत्रण कक्षाची व्यवस्था, दामिनी पथके आणि बाल-स्नेही पोलीस कर्मचाऱ्यांची नियुक्ती, तसेच लुटालूट आणि चोरी विरोधी पथके यांबाबत माहिती मागवली. याव्यतिरिक्त, गर्दीच्या ठिकाणी आपत्कालीन वैद्यकीय मदत, ज्यामध्ये ग्रीन कॉरिडॉर, बालरोगतज्ज्ञांची उपलब्धता आणि रुग्णवाहिका सेवांचा समावेश, याबद्दलही आयोगाने विचारणा केली आहे.

आयोगाने संबंधित वरिष्ठ पोलीस अधिकाऱ्यांना स्वतः किंवा अधिकृत प्रतिनिधींमार्फत उपस्थित राहण्याचे आणि उपस्थित केलेल्या मुद्द्यांवर जिल्हावार केलेल्या कार्यवाहीचा अहवाल सादर करण्याचे निर्देश दिले आहेत.

प्रमुख गणेशोत्सव मंडळाक़डून मागवला माहिती
राज्यभरातील प्रमुख गणेशोत्सव मंडळांमध्ये विद्युत सुरक्षा तपासणीसह अशा घटनांची (Kalachowki News) पुनरावृत्ती टाळण्यासाठी करण्यात आलेल्या उपाययोजनांची माहितीही आयोगाने मागवली. गर्दी आणि वाहतूक व्यवस्थापनाबाबत, आयोगाने लालबागचा राजा, श्रीमंत दगडूशेठ गणपती आणि इतर संवेदनशील ठिकाणांवरील व्यवस्थेचा तपशील मागवला आहे.

यात लहान मुले, महिला आणि ज्येष्ठ नागरिकांसाठी स्वतंत्र सुरक्षित मार्ग आणि आपत्कालीन बाहेर पडण्याचे मार्ग यांचा समावेश आहे. चेंगराचेंगरीची परिस्थिती टाळण्यासाठी बॅरिकेडिंग आणि गर्दी व्यवस्थापनाच्या योजना अंमलात आहेत का? याची विचारणाही आयोगाने पोलिसांकडे केली.