Jowar Price Hike – एकेकाळी सर्वसामान्यांच्या ताटातील मुख्य अन्न असलेली ज्वारीची भाकरी आता अक्षरशः श्रीमंती थाट ठरू लागली आहे. जुन्नर तालुक्यातील आळेफाटा, बेल्हे, आळे, राजुरी परिसरात ज्वारीचे उत्पादन घटल्याने बाजारात टंचाई निर्माण झाली असून, भाकरी महाग तर पोळी स्वस्त अशी उलट परिस्थिती निर्माण झाली आहे. सध्या जुन्नर कृषी उत्पन्न बाजार समितीच्या जुन्नर व बेल्हे उपबाजारात ज्वारीला तब्बल 5 हजार रुपये प्रतिक्विंटल दर मिळत आहे. याउलट गव्हाचा दर 2700 ते 3000 रुपयांच्या दरम्यान असल्याने पोळी सर्वसामान्यांच्या आवाक्यात राहिली असली, तरी भाकरी मात्र महागडी ठरू लागली आहे. पूर्वी गरिबांचे अन्न म्हणून ओळखली जाणारी ज्वारी आता आरोग्यदायी पर्याय म्हणून श्रीमंत वर्गात लोकप्रिय होत आहे. मधुमेह नियंत्रण, पचन सुधारणा आणि वजन कमी करण्यास मदत करणार्या गुणधर्मांमुळे डॉक्टरांकडूनही ज्वारीच्या भाकरीचा सल्ला दिला जात आहे. त्यामुळे ग्रामीण तसेच शहरी भागात मागणी झपाट्याने वाढली आहे. ज्वारी. मात्र वाढत्या मागणीच्या तुलनेत उत्पादनात मोठी घट झाली आहे. आळेफाटा व परिसरात ज्वारीचा पेरा गेल्या काही वर्षांत कमी झाला असून, लहरी हवामान, वाढता खर्च, मजुरांची कमतरता, पक्ष्यांचा त्रास आणि काढणीतील अडचणी यामुळे शेतकरी गहू किंवा इतर पिकांकडे वळत असल्याचे कडधान्य व्यापारी संजय चंगेडिया यांनी सांगितले. सध्या स्थानिक बाजारात ज्वारीची आवक अत्यल्प असून खरेदीदारांची संख्या अधिक असल्याने दरात सातत्याने वाढ होत आहे. परिणामी ज्वारी सहज उपलब्ध होणेही कठीण झाले आहे. दरवाढीचा सर्वाधिक फटका सर्वसामान्य व शेतमजूर वर्गाला बसत असून, पूर्वी रोजच्या जेवणातील भाकरी आता अनेकांच्या ताटातून हळूहळू गायब होत आहे. त्याऐवजी स्वस्त गहू किंवा तांदळावर भर दिला जात आहे. उन्हाळ्यात पचायला हलकी असल्याने ज्वारीच्या भाकरीची मागणी अधिक वाढते. फिटनेसकडे वाढलेला कल आणि पारंपरिक आहाराकडे वळण यामुळे भाकरीची लोकप्रियता पुन्हा वाढत असली, तरी वाढत्या दरामुळे ती सर्वसामान्यांच्या आवाक्याबाहेर जात असल्याचे चित्र आहे.
