Bharti Singh: भारतीय टेलिव्हिजनवरील लोकप्रिय विनोदी कलाकार भारती सिंह  (Bharti Singh)आज तिचा वाढदिवस साजरा करत आहे. आपल्या भन्नाट विनोदशैलीने आणि अचूक कॉमिक टायमिंगमुळे प्रेक्षकांच्या मनावर राज्य करणारी भारती आज मनोरंजनविश्वातील मोठं नाव आहे. मात्र, तिचा हा यशाचा प्रवास अजिबात सोपा नव्हता. प्रचंड गरिबी, वडिलांचे लहानपणीच झालेले निधन आणि अनेक अडचणींवर मात करत तिने स्वतःची वेगळी ओळख निर्माण केली.

पंजाबमधील अमृतसर येथे एका सामान्य कुटुंबात भारती सिंहचा जन्म झाला. ती अवघी दोन वर्षांची असताना तिच्या वडिलांचे निधन झाले. त्यानंतर संपूर्ण कुटुंबाची जबाबदारी तिच्या आईवर आली. आर्थिक परिस्थिती अत्यंत हलाखीची असल्यामुळे कुटुंबाला अनेक संकटांचा सामना करावा लागला.  (Bharti Singh)

एका मुलाखतीत भारतीने तिच्या बालपणातील कठीण दिवसांची आठवण सांगितली होती. तिने सांगितले होते की, अनेक वेळा घरात खाण्यासाठी पुरेसे अन्नही नसायचे. काही वेळा दुसऱ्यांचे उरलेले शिळे अन्न खाऊन दिवस काढावे लागत होते. इतरांच्या घरात सण-उत्सव साजरे होत असताना त्यांच्या घरात मात्र आर्थिक अडचणींमुळे निराशेचे वातावरण असायचे.

अशा कठीण परिस्थितीतही भारतीने हार मानली नाही. तिने शिक्षण सुरू ठेवले आणि स्वतःतील कला जपली. कॉलेजमध्ये असताना तिची भेट प्रसिद्ध विनोदी कलाकार सुदेश लहरी यांच्याशी झाली. त्यांनी भारतीच्या विनोद करण्याच्या शैलीतील क्षमता ओळखली आणि तिला या क्षेत्रात पुढे जाण्यासाठी प्रोत्साहन दिले.  (Bharti Singh)

 

 

कॉलेजमध्ये आयोजित करण्यात आलेल्या यूथ फेस्टिव्हलमध्ये भारतीने सुवर्णपदक जिंकले. या यशामुळे तिचा आत्मविश्वास आणखी वाढला. याच काळात तिची ओळख लोकप्रिय कॉमेडियन कपिल शर्मा यांच्याशी झाली. कपिल यांनी भारतीची कॉमिक टायमिंग पाहून तिला ‘द ग्रेट इंडियन लाफ्टर चॅलेंज’च्या ऑडिशनसाठी जाण्याचा सल्ला दिला.

कपिल यांचा हा सल्ला भारतीच्या आयुष्यातील सर्वात मोठा टर्निंग पॉइंट ठरला. ‘द ग्रेट इंडियन लाफ्टर चॅलेंज’मधून तिने प्रेक्षकांची मनं जिंकली आणि त्यानंतर तिने कधीच मागे वळून पाहिले नाही. अनेक कॉमेडी शो, रिअॅलिटी शो आणि विविध कार्यक्रमांमधून तिने स्वतःची वेगळी ओळख निर्माण केली. तिच्या विनोदशैलीमुळे तिला ‘लाफ्टर क्वीन’ म्हणूनही ओळख मिळाली.   (Bharti Singh)

व्यावसायिक आयुष्याप्रमाणेच भारतीचे वैयक्तिक आयुष्यही आनंदी आहे. २०१७ मध्ये तिने लेखक आणि पटकथाकार हर्ष लिंबाचिया यांच्याशी विवाह केला. अनेक वर्षे एकमेकांना ओळखल्यानंतर दोघांनी लग्नाचा निर्णय घेतला. २०२२ मध्ये त्यांच्या घरी मुलगा लक्ष्यचा जन्म झाला. सोशल मीडियावर भारती आणि हर्ष त्यांच्या मुलासोबतचे अनेक मजेशीर व्हिडिओ आणि फोटो चाहत्यांसोबत शेअर करत असतात.

आज भारती सिंह केवळ विनोदी कलाकार म्हणूनच नव्हे, तर यशस्वी सूत्रसंचालिका म्हणूनही ओळखली जाते. अनेक लोकप्रिय रिअॅलिटी शोचे सूत्रसंचालन करण्याबरोबरच ती स्वतःचा व्लॉग आणि पॉडकास्टही यशस्वीपणे चालवत आहे. तिच्या विनोदबुद्धीमुळे आणि सकारात्मक स्वभावामुळे ती आजही प्रेक्षकांची आवडती कलाकार आहे.

प्रचंड संघर्षातून उभं राहून यशाचं शिखर गाठणारी भारती सिंह अनेकांसाठी प्रेरणादायी ठरली आहे. गरिबीतून सुरू झालेला तिचा प्रवास आज लाखो चाहत्यांच्या प्रेमापर्यंत पोहोचला असून, मेहनत आणि जिद्दीच्या जोरावर कोणतेही स्वप्न पूर्ण करता येते, हे तिने आपल्या आयुष्यातून सिद्ध करून दाखवले आहे.