Jio IPO : रिलायन्स इंडस्ट्रीजची डिजिटल सेवा कंपनी जिओ प्लॅटफॉर्म्स लिमिटेडच्या बहुप्रतीक्षित प्रारंभिक सार्वजनिक भागविक्रीला (IPO) बाजार नियामक सेबीने मंजुरी दिली आहे. कंपनी या IPOच्या माध्यमातून सुमारे 4 अब्ज डॉलर म्हणजेच 37,700 कोटी रुपये उभारण्याच्या तयारीत आहे. IPO प्रत्यक्षात आल्यास तो देशातील सर्वात मोठ्या सार्वजनिक भागविक्रींपैकी एक ठरण्याची शक्यता आहे.

जिओ प्लॅटफॉर्म्सने प्रस्तावित IPOसाठी जूनमध्ये सेबीकडे ड्राफ्ट रेड हेरिंग प्रॉस्पेक्टस (DRHP) दाखल केला होता. सेबीकडून कंपनीला 28 ऑगस्ट रोजी अंतिम निरीक्षणे मिळाली. IPO प्रक्रियेत सेबीची ही मंजुरी महत्त्वाचा टप्पा मानला जातो. त्यामुळे आता कंपनीला नियामकीय प्रक्रिया पूर्ण करून IPO आणण्याचा मार्ग मोकळा झाला आहे.

27 कोटी नवीन शेअर्स जारी करणार –

DRHPनुसार, जिओ प्लॅटफॉर्म्स 27 कोटीपर्यंत नवीन इक्विटी शेअर्स जारी करणार आहे. IPOनंतर हे शेअर्स कंपनीच्या एकूण इक्विटी शेअर्सच्या सुमारे 2.9 टक्के असतील. इश्यूची किंमत बुक बिल्डिंग प्रक्रियेद्वारे निश्चित केली जाणार आहे.

जिओ प्लॅटफॉर्म्सच्या पेड-अप इक्विटीमध्ये रिलायन्स इंडस्ट्रीजची 66.43 टक्के हिस्सेदारी आहे. तर उर्वरित 33.57 टक्क्यांपैकी मेटा आणि गुगलची एकत्रित हिस्सेदारी 17.71 टक्के आहे.

27,500 कोटींचा वापर कर्जफेडीसाठी –

IPOमधून मिळणाऱ्या निव्वळ निधीचा वापर प्रामुख्याने दोन कारणांसाठी केला जाणार आहे. त्यातील सुमारे 27,500 कोटी रुपये रिलायन्स जिओ इन्फोकॉम लिमिटेडच्या (RJIL) कर्जाच्या आंशिक किंवा पूर्ण परतफेडीसाठी वापरण्याची कंपनीची योजना आहे. उर्वरित निधी सामान्य कॉर्पोरेट कामांसाठी वापरला जाणार आहे.

मागील सुमारे 20 वर्षांत मुकेश अंबानी यांच्या समूहातील प्रमुख कंपनीकडून येणारा हा पहिलाच मोठा सार्वजनिक निर्गम ठरणार आहे. मोठ्या कंपन्यांना किमान 2.5 टक्के इक्विटी सार्वजनिक करण्याची परवानगी देणाऱ्या लिस्टिंग नियमांमधील बदलानंतर जिओचा IPO चर्चेत आला होता. मात्र, कंपनीने केवळ नवीन शेअर्स जारी करून निधी उभारण्याचा निर्णय घेतला आहे.

IPOचे बुक रनिंग लीड मॅनेजर्स –

जिओ प्लॅटफॉर्म्सच्या IPOसाठी मॉर्गन स्टॅनली इंडिया, बोफा सिक्युरिटीज, अ‍ॅक्सिस कॅपिटल, गोल्डमन सॅक्स, एचडीएफसी बँक, एचएसबीसी सिक्युरिटीज, जेपी मॉर्गन इंडिया आणि एसबीआय कॅपिटल मार्केट्स हे बुक रनिंग लीड मॅनेजर्स आहेत. KFin Technologies ही या इश्यूची रजिस्ट्रार कंपनी आहे.

अन्य कंपन्यांनाही IPOची मंजुरी –

या आठवड्यात सेबीने पारस हेल्थकेअर, पुष्प ब्रँड इंडिया, एम के सन्स फाइन ज्वेल्स, सद्भाव फ्यूचरटेक आणि भारत PET यांच्या IPOला मंजुरी दिली आहे. याशिवाय पॅरामोटर डिजिटल टेक्नॉलॉजीच्या प्री-फायलिंगलाही मंजुरी देण्यात आली आहे.