नवी दिल्ली  – जेईई मेन परीक्षेची वाट पाहणाऱ्या विद्यार्थ्यांसाठी एक आनंदाची बातमी असून, ही परीक्षा 17 जुलै रोजी घेण्यात येणार आहे. या परीक्षेची तारीख संयुक्‍त प्रवेश मंडळाने बुधवारी जाहीर केली आहे.

विशेष म्हणजे जेईई मेनचा निकाल 14 ऑगस्टपर्यंत जाहीर होणार असल्याचे त्यांनी सांगितले. करोना साथीच्या आजारामुळे ही परीक्षा पुढे ढकलण्याचा निर्णय घेण्यात आला होता. बऱ्याच काळापासून या परीक्षा आयोजित करण्याबाबत चर्चा सुरू होती.

यावेळी देशभरातील 174 केंद्रांवर घेण्यात येणाऱ्या जेईई मेनमध्ये, 92,695 विद्यार्थी उपस्थित राहतील. संयुक्‍त प्रवेश मंडळाच्या म्हणण्यानुसार निकाल जाहीर झाल्यानंतर उमेदवारांचे समुपदेशन तीन टप्प्यात पूर्ण केले जाईल.

15 सप्टेंबरपर्यंत समुपदेशन प्रक्रिया पूर्ण करण्याची योजना आहे. इंजिनिअरिंगच्या प्रवेशासाठी होणाऱ्या या परीक्षेच्या तारखेची विद्यार्थी खूप दिवस प्रतीक्षा करत होती. अखेर मंडळाने परीक्षेसंदर्भात निर्णय घेतला.

यापूर्वी ही परीक्षा एप्रिलमध्ये घेण्यात येणार होती. परंतु, करोनाची दुसरी लाट आणि लॉकडाऊनमुळे ही परीक्षा पुढे ढकलण्याचा निर्णय घेण्यात आला होता. करोनाच्या धोक्‍यामुळे जेईई, एनईईटीसह अनेक प्रवेश परीक्षा आणि स्पर्धा परीक्षा पुढे ढकलण्यात आल्या आहेत. विद्यार्थ्यांच्या सुरक्षेचा विचार करता सरकारने हा निर्णय घेतला होता. करोनामुळे मंडळाने सर्व केंद्र व राज्यातील दहावी आणि बारावीच्या बोर्ड परीक्षा रद्द केल्या आहेत.