Ration Card : जळगाव जिल्ह्यात सार्वजनिक वितरण व्यवस्थेतील अपात्र आणि मयत लाभार्थ्यांची नावे वगळण्याची प्रक्रिया सुरू आहे. त्यामुळे पात्र आणि गरजू नागरिकांसाठी प्राधान्य कुटुंब योजनेत १ लाख १२ हजार ९७ लाभार्थ्यांचा नवीन इष्टांक उपलब्ध झाला आहे. तसेच अंत्योदय योजनेसाठी ३ हजार २६६ शिधापत्रिकांचा इष्टांक निश्चित करण्यात आला आहे.

रेशन धान्याचा लाभ मिळत नसलेल्या पात्र नागरिकांनी तहसील कार्यालयात किंवा ऑनलाइन अर्ज करावा, असे आवाहन जिल्हा पुरवठा अधिकारी महेश चौधरी यांनी केले आहे.

४७ हजार ६८५ लाभार्थी अपात्र –

रेशन धान्याच्या लाभासाठी अपात्र ठरलेल्या लाभार्थ्यांमध्ये आयकर भरणाऱ्या ४७ हजार ६८५ जणांचा समावेश आहे. यापैकी ३१ ऑक्टोबरपर्यंत अनेकांचा धान्याचा लाभ बंद करण्यात आला आहे. तर २२ हजार २९२ लाभार्थ्यांची प्रक्रिया अद्याप बाकी आहे. अपात्र शिधापत्रिकाधारक आणि मयत लाभार्थ्यांची नावे वगळण्याचे काम ३० नोव्हेंबरपर्यंत सुरू राहणार आहे. डिसेंबरपर्यंत पात्र लाभार्थ्यांची संख्या आणखी वाढण्याची शक्यता आहे.

ऑनलाइन अर्जाची सुविधाही उपलब्ध –

नवीन लाभार्थ्यांना संबंधित तहसील कार्यालयात ऑफलाइन अर्ज करता येईल. तसेच आरसीएमएस प्रणाली किंवा ‘मेरा राशन’ ॲपद्वारे ऑनलाइन अर्ज करता येतो. यासाठी रहिवासी पुरावा आणि आधारकार्ड आवश्यक आहे.

धान्य सुरू होण्यासाठी ४५ दिवस –

नवीन रेशनकार्ड मिळवणे, नाव समाविष्ट करणे किंवा नाव कमी करण्यासाठी ऑनलाइन अर्ज करता येतो. अर्जाची विविध स्तरांवर पडताळणी झाल्यानंतर पात्र लाभार्थ्याचे रेशनकार्ड तयार केले जाते. कार्डची पीडीएफ तयार झाल्यानंतर प्रत्यक्ष धान्याचा लाभ सुरू होण्यासाठी साधारण ४५ दिवस लागतात. त्यामुळे पात्र नागरिकांनी आवश्यक कागदपत्रांसह अर्ज करावा, असे आवाहन प्रशासनाने केले आहे.

दरम्यान, राज्यभरात सध्या रेशन कार्ड बंद होण्याच्या घटनांमध्ये वाढ झाली असून नागरिकांमध्ये चिंतेचे वातावरण आहे.