जळोची, (वार्ताहर)- आगामी बारामती लोकसभा मतदारसंघाची निवडणूक शरद पवार विरुद्ध अजित पवार अशीच होणार असून ही निवडणूक चुरशीशी होणार असल्याचे चित्र सध्या बारामतीत पाहायला मिळत आहे. थेट आत्याच्या उमेदवारी विरोधात प्रचार करणार असल्याचे स्पष्ट संकेत उपमुख्यमंत्री अजित पवार यांचे धाकटे चिरंजीव जय पवार यांनी पत्रकारांशी बोलताना दिले.

उपमुख्यमंत्री अजित पवार यांचे सख्खे पुतणे युगेंद्र पवार यांनी नुकतीच राष्ट्रवादी काँग्रेस पार्टी शरद पवार गटाच्या कार्यालयाला भेट दिली होती. यावेळी योगेंद्र पवार यांनी पवार साहेबांच्या सूचनेनुसार काम करणार असल्याचे सांगितले होते. त्यानंतर उपमुख्यमंत्री अजित पवार यांचे धाकटे चिरंजीव जय पवार यांनी बारामती दौरा केला.

यावेळी त्यांनी आगामी लोकसभेसाठी महायुतीच्या उमेदवाराचा प्रचार करणार असल्याचे सांगितले.लोकसभेची तयारी म्हणून गुरूवार (दि.२२) पासून दौऱ्याला सुरुवात केली आहे. बारामती तालुक्यात हा दौरा करणार असल्याचे जय पवार यांनी सांगितले. बारामतीतील राष्ट्रवादी काँग्रेस पक्षाच्या कार्यालयात त्यांनी पदाधिकाऱ्यांना नियुक्ती पत्र दिले.आगामी लोकसभेच्या तयारीबाबत बोलताना पवार म्हणाले की, रॅली, पदयात्रा, भेटीगाठी, बैठका घेऊन नागरिकांच्या समस्या समजून घेऊन त्या सोडवण्याचा प्रयत्न असेल.

तसं आपण दुसऱ्यांना बोलू शकत नाही
अजित पवारांचे सख्खे पुतणे युगेंद्र पवार यांनी नुकतीच शरद पवार कार्यालयाला भेट दिली होती. या भेटीबाबत त्यांना विचारले असता ते म्हणाले की, परिवारात ज्याची पसंती असेल ते लोक त्यांचा प्रचार करतील. जसं दादांनी भाषणात सांगितलं.. की कदाचित परिवारातील बाकीचे काही लोक माझा प्रचार करणार नाहीत. तसं आपण दुसऱ्यांना काही बोलू शकत नाही. त्यांना ज्यांचा प्रचार करायचा आहे त्यांना करू द्या. आपण आपला प्रचार करू.