J.D. Vance : अमेरिकेचे उपराष्ट्राध्यक्ष जे.डी. व्हान्स यांनी गेल्या वर्षी पुस्तकाची रॉयल्टी, गुंतवणूक आणि त्यांच्या ‘व्हेंचर-कॅपिटल’ फर्ममधून ७.४ दशलक्ष डॉलर्सपर्यंत (सुमारे ७.४ मिलियन) कमाई केली आहे, असे त्यांच्या ताज्या आर्थिक विवरणपत्रातून समोर आले आहे. अहवालानुसार, व्हान्स यांच्या कमाईचा सर्वात मोठा हिस्सा त्यांच्या २०१६ मधील ‘हिलबिली एलेजी’ या सर्वाधिक खप असलेल्या आत्मचरित्रातून आला आहे.

हिलबिली एलेजी या अमेरिकेतील कामगार वर्गाच्या संघर्षावर आधारित असलेल्या या पुस्तकातून त्यांना गेल्या वर्षी १ दशलक्ष ते ५ दशलक्ष डॉलर्सदरम्यान रॉयल्टी मिळाली. या पुस्तकावर २०२० मध्ये चित्रपटही बनवला गेला आहे. २०२४ मध्ये त्यांची कमाई २,१२,००० ते १.३ दशलक्ष डॉलर्सदरम्यान होती. कोट्यधीश असलेल्या व्हान्स यांनी बिटकॉइनमध्ये २,५०,००० ते ५,००,००० डॉलर्सदरम्यान गुंतवणूक केली आहे.

हेही वाचा – Tata Sierra EV : टाटा सिएरा ईव्ही भारतात लॉन्च; दमदार रेंज आणि ‘या’ आधुनिक फिचर्ससह बाजारात धुमाकूळ घालायला सज्ज! 

तसेच वॉशिंग्टन डी.सी. मधील मालमत्तेतून त्यांना ५०,००० डॉलर्सपर्यंतचे भाड्याचे उत्पन्न मिळाले आहे. याशिवाय, विविध ईटीएफ आणि पोर्टफोलिओमध्ये त्यांची २.६ दशलक्ष डॉलर्सपर्यंतची गुंतवणूक आहे. त्यांनी त्यांच्या ‘नार्या कॅपिटल मॅनेजमेंट’ या फर्ममधून पगार घेतला नसला, तरी एका कर्जरोख्याद्वारे त्यांना १ दशलक्ष डॉलर्सपर्यंतचे उत्पन्न मिळाले.

हेही वाचा – Nike shares fell : चीनमध्ये ‘नाईकी’ला मोठा झटका; थेट विक्री घटल्याने शेअर्स ७ टक्क्यांनी घसरले! 

अमेरिकेचे राष्ट्राध्यक्ष ट्रम्प यांच्या २०२५ मधील कमाईच्या तुलनेत व्हान्स यांचे उत्पन्न खूपच कमी आहे. ट्रम्प यांनी केवळ क्रिप्टोकरन्सी व्यवहारांतूनच १ अब्ज डॉलर्सपेक्षा जास्त कमाई केली आहे. ट्रम्प यांचा अहवाल ९२७ पानांचा, तर व्हान्स यांचा अवघ्या १७ पानांचा आहे. सध्या उपराष्ट्राध्यक्षांना २,३५,१०० डॉलर्सचा वार्षिक पगार मिळतो, जो एका नवीन आदेशांतर्गत या वर्षी २,९२,३०० डॉलर्स इतका होणार आहे.